Margar umsóknir bárust

March 15, 2013



Í ár bárust 146 umsóknir í umsóknarferli Kraums tónlistarsjóðs en því lauk mánudaginn 4. febrúar. Flokkun og yfirferð umsókna hefur nú staðið í tæpar þrjár vikur og það eru mörg frábær verkefni sem þarf að velja úr og gera upp á milli.

Kraumur hefur enn ekki tekið upp þann sið að notast við umsóknareyðublöð en allar umsóknir þurfa að innihalda yfirlit yfir verkefnið, upplýsingar um markmið þess og fjárhagsáætlun. Auk þess var mælst til þess að hljómsveitir og listamenn skiluðu inn ferilskrá og tónlist. Þetta gerir vissulega yfirferðina aðeins flóknari og seinlegri en um leið eru umsóknirnar persónulegri, margbreytilegri og einnig skemmtilegri eins og gefur að skilja. Hverjum hefði t.d. dottið í hug að inn á borð framkvæmdastjóra myndi berast sandur og skeljar með einni umsókninni?

Umsóknirnar eru vissulega margskonar og mismunandi en eitt er víst og það er að það er hugur í íslensku tónlistarfólki og það er óhrætt við að virkja sköpunarkraftinn og sækja á innlendan sem og erlendan markað. Hugmyndir að verkefnum eru metnaðarfullar og margvíslegar. Þau verkefni sem bíða hljómsveita, listamanna og viðburðastjórnenda sem sóttu um stuðning og samstarf við Kraum eru virkilega spennandi og það er gaman að upplifa þessa gróskumiklu tíma í íslensku tónlistarlífi.

Flokka má þau verkefni sem sótt var um gróflega í fimm flokka en um er að ræða 167 verkefni sem umsóknirnar 146 hafa að geyma. Flestar umsóknirnar í ár tengjast tónleikahaldi erlendis en svo bárust margar óskir um stuðning vegna hljómplötuvinnslu, nýsköpunar og til kynningar á verkum listafólks og tónlistarfólkinu sjálfu. Fjöldi umsókna snéri að tónleikahaldi og öðrum verkefnum innanlands auk ýmissa annarra verka sem hafa með kynningu og eflingu á íslenskri tónlist að gera.

Samanlagður kostnaður við verkefnin 167 sem sótt var um stuðning fyrir hleypur á um 300 milljónum en sótt var um styrki fyrir rúmlega þriðjungi þeirrar fjárhæðar eða um tæpar 800 þúsund krónur á hvert verkefni. Kraumur leggur ávallt metnað sinn við að styðja frekar færri verkefni og listamenn en gera það þannig að stuðningurinn sé afgerandi þegar kemur að styrkjum. Verkefnaval Kraums tekur mið að því að styrkir til listamanna og verkefna eru í flesta staði veglegir og þar af leiðandi færri yfir heildina.

Kraumur tónlistarsjóður var stofnaður í byrjun árs 2008 af Aurora velgerðarsjóði. Kraumur hefur það meginhlutverk að efla íslenskt tónlistarlíf, fyrst og fremst með stuðningi við unga listamenn til að auðvelda þeim að vinna að listsköpun sinni og koma verkum sínum á framfæri innanlands sem utan. Markmið Kraums er að styrkja stöðu tónlistarmanna á Íslandi með beinum styrkjum, aðstoð, ráðgjöf og samstarfi af ýmsu tagi. Kraumur vill jafnframt styðja við og ýta undir nýsköpun og metnað á tónlistarsviðinu.

Í fyrra úthlutaði Kraumur tónlistarsjóður um miðjan mars og voru 15 verkefni styrkt af sjóðnum. Frá því Kraumur hóf starfsemi sína hafa yfir eitthundrað listamenn og hljómsveitir hlotið stuðning frá sjóðnum, þar á meðal eru adhd, amiina, Anna Þorvaldsdóttir, Bang Gang, Bloodgroup, Celestine, Daníel Bjarnason, Dikta, Eistnaflug, Elfa Rún Kristinsdóttir, Hjaltalín, Kammerkór Suðurlands, Lay Low, Melkorka Ólafsdóttir, Moses Hightower, Mr. Silla, Mugison, Nordic Affect, Of Monsters and Men, Ólöf Arnalds, Retro Stefson, Skálmöld, Sóley, Sólstafir, Seabear, Snorri Helgason, Trúbatrix hópurinn og Víkingur Heiðar Ólafsson. Kraumur hefur einnig haldið úti samstarfsverkefnum með Músíktilraunum Tónabæjar, Listahátíð í Reykjavík, Aldrei fór ég suður, ÚTÓN/IMX og fleiri aðilum.

Auk beins stuðnings við einstaka listamenn/hljómsveitir og verkefni þeirra á sviði plötuútgáfu, tónleikahalds og kynningar innanlands sem utan hefur Kraumur starfrækt eigin verkefni til breiðari stuðnings í tónlistarlífinu. Má þar m.a.nefna Innrásina sem veitir stuðning til hljómsveita til að sinna tónleikhaldi innanlands, Kraumslistann sem verðlaunar og styður við bakið á íslenskri plötuútgáfu og verðlaunar þá titla sem þykja skara fram úr í frumleika og metnaði á ári hverju. Auk þessi hefur Kraumur í samstarfi við Músíktilraunir starfrækt Hljóðverkssmiðjur þar sem ungum og upprennandi listamönnum og hljómsveitum gefst kostur á að fá ráðgjöf og vinna nýtt efni undir leiðsögn reyndari tónlistarmanna.

Í fyrra var prófuð sú nýjung í starfsemi Kraums að veita lægri styrki til verkefna þegar að hausta tók, veita svokallaða Skyndistyrki. Þetta ferli er ekki auglýst sérstaklega en safnað er saman erindum tónlistarfólks og farið yfir þau mánaðarlega. Þessi stuðningur er hugsaður til að brúa bilið og hjálpa listamönnum til að grípa tækifæri sem koma upp með stuttum fyrirvara eða á þeim tíma sem enga styrki er að fá og margir sjóðir eru tómir. Skyndistyrki á að veita mánaðarlega síðasta ársfjórðung ársins og skila ber erindum til framkvæmdastjóra.

Það er ljóst að Kraumur mun aðeins styðja við hluta þeirra verkefna sem sótt var um stuðning fyrir í nýliðnu umsóknarferli enda yfirlýst stefna sjóðsins að styrkja fá verkefni/listamenn en gera það afgerandi. Tilkynnt verður hverjir hljóta styrki úr Kraumi tónlistarsjóði fimmtudaginn 21. mars.