Rannsóknarmiðstöð skapandi greina hjá Viðskiptafræðistofnun Háskóla Íslands kynnti þann 13. mars árangursmat á starfsemi Hönnunarsjóðs Auroru og Kraums tónlistarsjóðs.

Góð mæting var í stofu 101 á Háskólatorgi þegar Viðskiptafræðistofnun Háskóla Íslands kynnti árangursmat sitt á starfsemi og styrkveitingum Kraums tónlistarsjóðs og systursjóðnum Hönnunarsjóðs Auroru. Báðir sjóðirnir voru stofnaðir af Auroru velgerðarsjóði, með árs millibili árin 2008 og 2009.

Markmið með gerð árangursmatsins var fyrst og fremst að aðstoða stjórnendur sjóðanna til að meta það starf sem á sér stað innan sjóðanna, hvaða áhrif það hefur á frama styrkþega og einnig hönnunar- og tónlistarsamfélagið í víðari skilningi. Einnig var árangursmatið hugsað sem lærdómur um það hvernig best er að standa að styrkveitingum, hvaða form gefur bestan árangur, hvaða aðferðarfræði hentar best þeim sem sækja um styrki og hvaða ásýnd svona sjóðir hafi gagnvart umsækjendum og samstarfsaðilum.
Höfundar skýrslunnar eru þau Margrét Sigrún Sigurðardóttir og Tómas Viktor Young
en þau kynntu helstu niðurstöður árangursmatsins.

Auður Einarsdóttir framkvæmdastjóri Auroru velgerðasjóðs, Hlín Helga Guðlaugsdóttir framkvæmdastjóri Hönnunarsjóðs Auroru og Eldar Ástþórsson framkvæmdastjóri Kraums tónlistarsjóðs fóru einnig yfir starfsemi sjóðanna en Kraumur og Hönnunarsjóður Auroru eru dóttursjóðir Auroru velgerðasjóðs.

Rannsóknin var byggð á á hálfopnum viðtölum við framkvæmdastjóra sjóðanna og styrkþega. Niðurstaða árangursmatsins leiddi í ljós almenna ánægju meðal styrkþega með sjóðina en umsóknarferlið þykir persónulegt og óformlegt. Vegna aukins fjölda umsókna benda höfundar skýrslunnar á að nauðsynlegt sé að gera umsóknarferlið formfastara. Í síðasta umsóknarferli fékk Kraumur 233 umsóknir en Hönnunarsjóður
Auroru 80 umsóknir sem er umsóknarmet síðan sjóðirnir hófu starfsemi sína.

Flestir styrkir úr Kraumi tónlistarsjóði hafa verið veittir í annað hvort plötuupptökur, útgáfu eða tónleikaferðalög innanlands og erlendis. Einnig hefur Kraumur styrkt verkefni til að standa straum af kynningarstarfi erlendis á plötuútgáfu, kynningu á klassískri tónlist í framhaldsskólum á Íslandi og fleira.

Styrkþegar voru allir sammála um að styrkurinn hafi hjálpað þeim mikið í framkvæmd verkefnisins sem sótt var um en hefðu samt sem áður framkvæmt verkefnin sín án styrksins. Þetta sýnir í raun að sjóðirnir eru á réttri leið með að styrkja verkefni sem eru með skýra framtíðarsýn og markmið og líklegri til að verða að veruleika.

Markmið sjóðanna er að veita styrki sem eru veglegri til fárra verkefna svo stuðningurinn skipti sköpum fyrir verkefnin. Rannsakendur benda á að þróun í átt að lægri styrkjum til stærri hóps sé ekki að þjóna markmiðum sjóðanna og minnki líkur á árangri fyrir styrkþegana sjálfa. Þessi hætta sé fyrir hendi þegar fjöldi góðra umsókna eykst og var þróun hjá sjóðunum á ákveðnum tímapunkti.

Niðurstaða árangurmatsins er því sú að styrkþegar eru ánægðari með að sjóðirnir veiti veglegri styrki á færri verkefni. Sjóðirnir hafa tekið það til sín og munu leitast við að framfylgja þeim markmiðum.

Framkvæmdastjórum sjóðanna ber saman um að gerð árangursmats sé mikilvægt framlag fyrir starfsemi sjóðanna. Hér sé á ferð rannsókn sem hjálpi til við mótun stefnu þeirra í styrkveitingum og almennri starfsemi. Góðar leiðbeiningar við hvernig má styrkja og efla starfsemina, viðhalda þeim verkþáttum sem virka hvað best – en gera breytingar þar sem umbóta er þörf. Starfsemi sjóðanna hafi verið í stöðugri þróun síðustu ár, enda sett upp sem tilraunaverkefni, og rannsókn sem þessi sé ekki aðeins gott veganesti fyrir komandi starfsár, heldur veki vonandi upp umræður um það sem betur má fara í styrkveitingum almennt.

Á mynd: Auður Einarsdóttir, framkvæmdastjóri Aurora velgerðarsjóðs, Eldar Ástþórsson, framkvæmdastjóri Kraums tónlistarsjóðs, Margrét Sigrún Sigurðardóttir, lektor við Viðskiptafræðistofun Háskóla Íslands og höfundur árangursmatsins, Tóms Viktor Young höfundur árangursmatsins, Hlín Helga Guðlaugsdóttir framkvæmdastjóri Hönnunarsjóðs Auroru.

Rannsóknarmiðstöð skapandi greina hjá Viðskiptastofnun Háskóla Íslands kynnir árangursmat á starfsemi Hönnunarsjóðs Auroru og Kraums tónlistarsjóðs.

Þriðjudaginn 15. mars mun Rannsóknarmiðstöð skapandi greina hjá Viðskiptastofnun Háskóla Íslands kynnaárangursmat sitt á starfsemi sjóðanna tveggja sem báðir voru stofnaðir af Aurora velgerðarsjóði; Hönnunarsjóðs Auroru og Kraumi tónlistarsjóði.

Kynningin fer fram í Háskóla Íslands, Háskólatorgi, stofu HT 101. Allir velkomnir.

Léttar veitingar að kynningu lokinni.

Kraumur og nágrannar í Vonarstræti sameinast um dagskrá og verða með opið hús á Menningarnótt. Kraumur og Trúbatrix bjóða upp á tónleika á Rósenberg.

Kraumur tónlistarsjóður, Hönnunarsjóður Auroru og Hönnunarmiðstöð Íslands - sem deila aðstöðu í húsinu að Vonarstræti 4B (portið á móti Iðnó) - verða með opið hús og sameinast um dagskrá á Menningarnótt. Hljómsveitin Orphic Oxtra (mynd) mun taka lagið, lifandi upptökur frá HönnunarMarsi 2010 sýndar, svipmyndir frá hönnunarsýningunum Iceland Contemporary Design sem opnaði á Listahátíð 2009 og sitthvað fleira.

Opið hús og dagskrá frá klukkan 18.00-22.00. Orphic Oxtra spilar klukkan 20.00. Allir velkomnir!!

Auk þess mun Kraumur og Trúbatrix bjóða upp á tónleika á Kaffi Rósenberg. Tónleikarnir þar eru liður í tónleikaferð um landið þar sem Lára, Myrra Rós og fleiri tónlistarkonur leika víða um land. Húsið opnar klukkan 20.00 og tónleikarnir hefjast skömmu síðar. Aðgangur er ókeypis.

Hlekkir
Trúbatrix og Kraumur tónleikaferð - Tónlistarkonur leggja land undir fót
Trúbatrix Hönnunarsjóður Auroru - www.honnunarsjodur.is
Hönnunarmiðstöð Íslands - www.honnunarmidstod.is
Menningarnótt - www.menningarnott.is

Hljómsveitin Útidúr lék á Vorhátíð í Vonarstræti

Hönnunarmiðstöð Íslands, Hönnunarsjóði Auroru og Kraumur tónlistarsjóður - sem deila húsnæði við Vonarstræti 4B - stóð ásamt fjölda fagfélaga fyrir Vorhátíð föstudaginn 28. maí. Mikil og góð stemmning myndaðist í portinu. Boðið var upp á veitingar og gleði. Hljómsveitin Útidúr lék nokkur lög við góðan orðstír.

Takk fyrir komuna og takk fyrir okkur Útidúr fyrir frábæra tónleika!

Hlekkir:

• Útidúr á Facebook
• Útidúr á MySpace
• Útidúr á gogoyoko
• Hönnunarmiðstöð Íslands
• Hönnunarsjóður Auroru

Fleiri myndir á Facebook síðu Kraums.

Aurora velgerðarsjóður úthlutar 20 milljónum til Kraums tónlistarsjóðs og áframhaldandi starfsemi og stuðningi sjóðsins á sviði íslensks tónlistarlífs.

Stjórn Auroru velgerðasjóðs kynnti þann 16. mars þá ákvörðun sína að veita alls 100 milljónir króna til fjögurra verkefna á sviði mannúðar, mennta og menningar hérlendis og í Afríkuríkinu Síerra Leóne.

Nýtt styrktarverkefni sjóðsins er Brúðuheimar í Borgarnesi, lista- og menningarmiðstöð, sem verður mikilvægur þáttur í menningartengdri  ferðaþjónustu á svæðinu.  Brúðuheimar fá 15 milljónir króna, þar af 7 milljónir króna í formi láns. Þrjú verkefni fá styrki í annað eða þriðja sinn: Hönnunarsjóður Auroru fær 25 milljónir króna, Kraumur, tónlistarsjóður Auroru, fær 20 milljónir króna og menntaverkefni í Síerra Leóne fær 40 milljónir króna.

Þetta er í þriðja sinn sem styrkir eru veittir úr Auroru velgerðasjóði, sem hjónin Ingibjörg Kristjánsdóttir og Ólafur Ólafsson stofnuðu janúar 2007 og lögðu til einn milljarð króna. Á þessum þremur árum hefur fjármunum verið varið úr sjóðnum til verkefna sem stuðlað geta að betra mannlífi á Íslandi og í þróunarlöndunum. Aurora velgerðasjóður er sjálfseignarstofnun með sjálfstæða stjórn um fjármuni sem stofnuninni hafa verið afhentir með óafturkræfum hætti. Stofnfé Auroru velgerðasjóðs hefur ávaxtast ágætlega og er í dag um 1,3 milljarðar króna.

Styrkir upp á alls 400 milljónir króna
Sjóðurinn hefur verið trúr þeim meginmarkmiðum sínum að styrkja fá en stór verkefni þar sem þörf er fyrir verulega fjármuni til að þau geti orðið að veruleika og dafnað.  Sjóðsstjórn tekur jafnframt mið af því að viðkomandi verkefni hafi afgerandi áhrif í samfélögum sínum. Lögð er áhersla á að fjárframlög sjóðsins á Íslandi efli nýsköpun og sprotastarfsemi og auðgi þannig flóru atvinnugreina í landinu. Verkefni, sem Aurora styrkir í þróunarlöndunum, eru tengd menntun og menningu en einnig heilsugæslu. Leitast er við að fylgja verkefnum vel eftir og aðstoða styrkþega og samstarfsaðila eftir föngum.

Frá stofnun, fyrir þremur árum, hefur Aurora velgerðasjóður ráðstafað alls 322,5 milljónum króna til 11 verkefna.  Þar af hafa 144,5 milljónir króna runnið til fjögurra verkefna í Afríku og Nepal og 178 milljónir króna til sjö verkefna hér á landi. Þess má geta að áður en sjóðurinn var formlega stofnaður styrktu þau Ingibjörg og Ólafur tvö verkefni, hér á landi og í Afríkuríkinu Síerra Leóne, um 78 milljónir króna, þannig að heildarupphæð styrkja er orðin um 400 milljónir króna.

Landnámssetrið í Borgarnesi er annað þessara tveggja innlendu verkefna og markaði reyndar upphafið að stofnun Auroru velgerðasjóðs. Það er um margt dæmigert fyrir verkefni sem sjóðurinn styrkir hér á landi og setrið  hefur tvímælalaust haft mikil áhrif í heimahéraði sínu og raunar í íslensku samfélagi. Fuglasafn Sigurjóns við Mývatn er annað áhugavert verkefni sem Aurora velgerðasjóður hefur styrkt á landsbyggðinni. Sjóðurinn hefur einnig haft frumkvæði að því að stofna tvo dóttursjóði, Kraum tónlistarsjóð og Hönnunarsjóð Auroru.

Rökstuðningur Auroru í stuðningi við Kraum tónlistarsjóð:
Kraumur, tónlistarsjóður Auroru fær 20 milljónir króna til að styrkja ungt tónlistarfólk til listsköpunar og til kynningar á verkum sínum. Kraumur var stofnaður í ársbyrjun 2008 að frumkvæði Auroru velgerðasjóðs og er þetta í þriðja sinn sem sjóðurinn fær þessa upphæð til úthlutunar. Markmið með stofnun sjóðsins var m.a. að styrkja unga tónlistarmenn á Íslandi með beinum fjárstuðningi, faglegri aðstoð og samstarfi af ýmsu tagi.
Starfsemi Kraums tónlistarsjóðs hefur verið umfangsmikil og blómleg.

Á þessum tveimur árum hefur sjóðurinn úthlutað tæplega 30 milljónum króna í beinum styrkjum til 74 tónlistarmanna, hljómsveita og tónlistartengdra verkefna.  Einnig hefur sjóðurinn átt fjölbreytt samstarf við ýmsa aðila innan tónlistargeirans. Sjóðurinn hefur m.a. styrkt tónleika og tónleikaferðalög heima og heiman, aðstoðað við markaðssetningu erlendis og staðið fyrir nýjum tónlistarviðurkenningum, Kraumslistanum.

Ljóst  er að nærvera sjóðsins skiptir miklu máli í íslensku menningarlífi, sem marka má til dæmis af því að tæplega 200 umsóknir bárust þegar síðast var auglýst úthlutun úr sjóðnum! Framkvæmdastjóri Kraums, tónlistarsjóðs Auroru, er Eldar Ástþórsson.

Frekari upplýsingar
Frekari upplýsingar um Auroru velgerðarsjóð og styrktarverkefni hans 2010 má finna á heimasíðu sjóðsins;
http://www.aurorafund.is/

Kraumur tónlistarsjóður auglýsir eftir umsóknum fyrir verkefni á sviði íslenskrar tónlistar sem ráðgert er að eigi sér stað á næsta ári.

Tónlistarmenn og hljómsveitir úr öllum geirum tónlistar eru hvattir til að sækja um fyrir sín verkefni. Umsóknarferlið er einnig opið fyrir verkefnastjóra og viðburði.  Opnað verður fyrir umsóknarferlið á degi Íslenskrar tónlistar, föstudaginn 11. desember og því lýkur 20. janúar á næsta ári.

Kraumur notast ekki við umsóknareyðublöð, en allar umsóknir skulu innihalda;

• Yfirlit yfir verkefnið
• Markmið þess
• Fjárhagsáætlun.

- Mælst er til þess að umsóknir séu ekki lengri en 2 síður.
- Umsóknum má skila með tölvupósti eða bréfleiðis.
- Væntanlegum umsækjendum er bent á að kynna sér markmið og samþykktir sjóðsins hér, sem og þau verkefni sem Kraumur hefur stutt og unnið með árin 2008 og 2009.

Umsóknarfrestur er til 20. janúar.

Framkvæmdastjóri Kraums veitir fúslega upplýsingar um umsóknarferlið - og er umsækjendum til reiðu er varðar ráðgjöf við að skila inn umsókn.

Skil á umsóknum
Umsóknir skulu sendar:
Kraumur tónlsitarsjóður
PO Box 124
121 Reykjavík

Frekari upplýsingar veitir
Eldar Ástþórsson, framkvæmdastjóri Kraums
S: 869 8179 / eldar[a]kraumur.is

Kraumur tónlistarsjóður flytur í Vonarstrætið.

Kraumur tónlistarsjóður flytur starfsemi sína af Klapparstíg 16 niður í kvosina, Vonarstræti 4a. Í kjallara hússins mun sjóðurinn deila aðstöðu með Hönnunarsjóði Auroru og mun rýmið vera nýtt fyrir margskonar starfsemi sjóðana tveggja. Á efri hæðinni er Hönnunarmiðstöð Íslands staðsett.

Stefnan er að Vonarstrætið geti hýst ýmsa fundi og uppákomur sem eru á vegum Kraums og Hönnunarsjóðsins, eða tengjast starfsemi þeirra.

Þriðjudaginn 3. nóvember mun nýtt heimili Kraums vera vettvangur fyrir vinnusmiðjur á vegum Útflutningsskrifstofu íslenskrar tónlistar (ÚTÓN) um markaðsetningu tónlistarmanna á netinu. Það er Ariel Hyatt fjölmiðlaplöggari frá Cyber PR í New York sem hefur umsjón með smiðjunni, þar sem íslenskum listamönnum og hljómsveitum verða kynntir möguleikar um hvernig koma eigi sér og tónlist sinni á framfæri á netinu. Síðar um kvöldið heldur Ariel tölu á fyrsta fræðslukvöldi ÚTÓN í vetur sem haldið verður í Norræna húsinu.

Frumkvöðlaverkefnið musemap.com er vettvangur á netinu fyrir klassíska tónlist og nútímatónlist sem Hugi Guðmundsson tónskáld átti frumkvæði að því að setja á laggirnar.

MusMap.com er vefsíða sem sett var á laggirnar til að efla klassíska tónlist og styrkja tengsl þeirra sem að listgreininni starfa á einn eða annan hátt. Síðan varð til að frumkvæði Huga Guðmundssonar tónskálds, með tæknilegri aðstoð Nuno Zimas forritara frá Portúgal. Í upphafi þessa árs hlaut verkefnið stuðning frá Aurora velgerðarsjóði til að þróa verkefnið lengra og markaðsetja síðuna á alþjóðavettvangi.

Heimasíðunni er ætlað að vera einskonar torg fyrir einleikara, hljómsveitir eða tónskáld til að kynna sig, verk sín eða verkefni og jafnframt vettvangur fyrir skipuleggjendur viðburða af öllu tagi til að finna tónlist eða tónlistarflytjendur sem hæfa einhverjum viðburði. Aðstandendur síðunar komu henni upp í sjálfboðavinnu, en með stuðningi Auroru hefur þeim verið gert kleift að þróa og forrita kynningarkerfi hennar lengra.

Í rökstuðningi Auroru fyrir stuðningi við verkefnið segir m.a.

Mus.Map.com er afrakstur sjálfboðavinnu í þeim frumkvöðlaanda sem Aurora velgerðasjóður vill hlúa að og efla, einstætt viðfangsefni á sinn hátt og stuðlar ekki síst að því að klassísk tónlist nái eyrum ungs fólks. Hugi Guðmundsson hefur skýra framtíðarsýn í þessum efnum og og verkefnið sé tiltölulega smátt í sniðum, enn sem komið er, hefur það alla burði til að verða drifkraftur og áhrifavaldur í heimi klassískrar tónlistar um víða veröld. Vefurinn er helsti vettvangur kynningar og markaðssetningar dægurtónlistar en flytjendur, tónskáld og unnendur klassískrar tónlistar hafa hins vegar engan sameiginlegan vettvang átt þar fyrr en nú, að frumkvæði Huga.

Musemap.com er komið á fulla ferð og spennandi tímar framundan. Vefsíðan er enn sem komið er starfrækt í Beta prufumhverfi, en fjölmargir listamenn eru þegar farnir að nýta þjónustu þess. Framundan er frekari þróunarvinna og markaðsetning á síðunni.

Hlekkir:
musemap.com
Aurora velgerðarsjóður
Aurora styður Musemap.com

Stjórn Auroru velgerðarsjóðs tilkynnti þann 12. febrúar að Kraumur tónlistarsjóður fengi 20 milljón króna framlag til að styðja og styrkja ungt tónlistarfólk til listsköpunar og til kynningar á verkum sínum.

Kraumur var stofnaður í ársbyrjun 2008 að frumkvæði Auroru velgerðasjóðs og var þá tilkynnt að Aurora myndi ráðstafa til tónlistarsjóðsins alls 50 milljónum króna í þrennu lagi á árunum 2008-2010.  Stjórn Auroru ákvað að bæta 5 milljónum króna við 15 milljóna króna framlag í ár, “enda hefur Kraumur sýnt og sannað að hans er þörf” eins og segir í tilkynningu frá stjórn Auroru.

Í tilkynningu Auroru segir jafnframt;

“Nærvera sjóðsins skiptir miklu máli í íslensku menningarlífi. Starfsemi Kraums er umfangsmikil og blómleg og sjóðurinn hefur víða komið við. Hann styrkti tónleika og tónleikaferðalög heima og heiman, aðstoðaði við markaðssetningu og stóð fyrir nýjum tónlistarviðurkenningum, Kraumsverðlaunum, svo nokkuð sé nefnt. “

Framkvæmdastjóri og stjórn Kraums þakkar traustið sem starfsemi sjóðsins er sýnd. Það er frábært tækifæri að fá að takast á við nýtt starfsár Kraums af sama, ef ekki meiri, krafti en á liðnu upphafsári.

Stjórn Auroru velgerðasjóðs hefur úthlutað alls 111,5 milljónum króna í styrki til sex verkefna á sviði mannúðar, mennta og menningar hérlendis og í Afríkuríkjunum Síerra Leóne og Mósambík, þar af til fjögurra verkefna sem sjóðurinn hefur ekki styrkt áður.

Þetta er í annað sinn sem styrkir eru veittir úr Auroru velgerðasjóði sem hjónin Ingibjörg Kristjánsdóttir landslagsarkitekt og Ólafur Ólafsson, stjórnarformaður Samskipa og Alfesca, stofnuðu 23. janúar 2007 og lögðu til einn milljarð króna. Samkvæmt stofnskrá er gert ráð fyrir að verja arði og vaxtatekjum sjóðsins til verkefna sem stuðlað geta að betra mannlífi á Íslandi og verkefna í þróunarlöndum.

Frekari upplýsingar: www.aurorafund.is

Á mynd; Ólafur Ólafsson, stjórnarmaður í Auroru velgerðasjóði, Sigurður Guðmundsson, stjórnarmaður í Auroru, Kristján Sturluson, framkvæmdastjóri Rauða krossins, Stefán Ingi Stefánsson, framkvæmdastjóri UNICEF á Íslandi, Hlín Helga Guðlaugsdóttir, framkvæmdastjóri Hönnunarsjóðs Auroru, Eldar Ástþórsson, framkvæmdastjóri Kraums, tónlistarsjóðs Auroru,  Þórunn Sigurðardóttir, stjórnarmaður í Auroru og Ingibjörg Kristjánsdóttir, stjórnarformaður Auroru. Einn styrkþeganna, Hugi Guðmundsson, býr í Kaupmannahöfn og var því ekki á samkomu Auroru í Iðnó þegar styrkjum var úthlutað.

Kraumsverðlaunin 2008. Nýtt myndband Stuart Rogers um verðlaunin og Kraum komið á Kraumur TV @ LoFi.TV. Horfa má á myndbandið hér að neðan, einnig á Facebook og það er til niðurhals hér.

Meðal þeirra sem koma fram í myndbandinu eru; Agent Fresco, FM Beflast, Mammút, Retro Stefson, Árni Rúnar Hlöðversson (FM Belfast), Katrína Mogensen og Arnar Pétursson (Mammút), Daníel Bjarnason (Ísafold), Unnsteinn Stefánsson (Retro Stefson), Eldar Ástþórsson (framkvæmdastjóri Kraums), Árni Mattíasson (blaðamaður á Morgunblaðinu og formaður dómnefndar Kraumsverðlaunanna), Halla Steinunn Stefánsdóttir (þáttagerðarmaður á Rás 1 og meðlimur dómnefndar Kraumsverðlaunanna) og Ólafur Páll Gunnarsson (tónlistarstjóri Rásar 2 og meðlimur dómnefndar Kraumsverðlaunanna).

Kraumur Awards 2008 documentary from lofi.tv on Vimeo.