PARTÍÞOKAN verður á Græna Hattinum Akureyri laugardaginn 22. október

FM BELFAST, PRINSPÓLÓ, SIN FANG og BORKO

Það er nokkuð ljóst að sumarið er búið, haustið er að renna sitt skeið og veturinn að taka yfir kaldur og blautur. Það þýðir samt ekkert að stara í myrkrið eins og blindur kettlingur því það er spáð Partíþoku víða um land.

Partíþokan byrjar á Akureyri laugardaginn 22. október, nánar tiltekið Græna Hattinum, þar sem hljómsveitirnar FM Belfast, Prinspóló, Sin Fang og Borko munu skemmta með tónleikahaldi og uppistandi.

Aðrir viðkomustaðir Partíþokunnar verða kynntir síðar svo það borgar sig að fylgjast með fréttum af veðri og færð. Það verður sumsé þokalega góð stemming á Græna hattinum á laugardaginn, þokuljós og þokulúðrar, en munið bara að ganga hægt um gleðinnar dyr. Forsala miða er í Eymundsson Hafnarstræti og það borgar sig að tryggja sér miða í tíma því það leynist ýmislegt í þokunni.

Hér má hlusta á lagið Partíþokan í flutningi Prinspóló og FM Belfast: Partíþokan

Textinn við lagið er hér: Partíþokan texti

Það er Kraumur tónlistarsjóður, Rás 2 og Bílaleiga Akureyrar sem styðja við Partíþokuna.

Sjáumst í þokunni!

Kraumur tónlistarsjóður kynnir úthlutun til listamanna og verkefna sem eiga sér stað innanlands í sumar, haust og vetur 2011. Rúmlega tveimur milljónum króna er varið til 6 verkefna á sviði Innrásar íslenskrar tónlistar á heimamarkað.

Kraumur tónlistarsjóður kynnti fimmtudaginn 13. júlí úthlutun sína til verkefna íslenskra listamanna og hljómsveita sem taka þátt í Innrás Kraums 2011. Verkefnavalið er fjölbreytt og tónlistarstefnur margar, allt frá klassískum ljóðasöng yfir í þungarokk og raftónlist.

Þeir sem njóta stuðning Kraums að þessu sinni eru Hallveig Rúnarsdóttir og Gerrit Schuil, hljómsveitirnar Valdimar, Ghostigital og Captain Fufanu, Frelsissveit Nýja Íslands sem leika mun á djasshátíð og Skálmöld sem heimsækir þar að auki Færeyjar. Tónleikaferðin Partíþokan hlýtur hæsta styrkinn að þessu sinni en verkefnið er hugarfóstur Svavars Péturs Eysteinssonar sem fer fyrir hljómsveitinni Prinspóló. Með í för verða FM Belfast, Borko og Sin Fang auk Prinspóló.

Markmið Innrásarinnar er að auka við möguleika listamanna og hljómsveita til tónleikahalds innanlands, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni.

Alls bárust 119 umsóknir í nýliðið umsóknarferli Kraums og því ljóst að Kraumur myndi aðeins styðja við lítinn hluta þeirra verkefna sem sóttu um til sjóðsins. Samræmist það yfirlýstri stefnu sjóðsins að styrkja frekar tiltölulega fá verkefni/listamenn - en gera það þannig að stuðningurinn sé afgerandi fyrir viðkomandi listamenn og verkefni þeirra. Í dag er tilkynnt um alls 6 verkefni sem Kraumur mun styrkja og styðja við.

Megintilgangur Kraums er að styrkja íslenskt tónlistarlíf, fyrst og fremst með stuðningi við unga tónlistarmenn. Frá því sjóðurinn var settur á laggirnar í upphafi árs 2008 hafa í kringum 80 hljómsveitir og listamenn fengið stuðning úr sjóðnum, auk þess sem Kraumur hefur sjálfur staðið fyrir fjölda verkefna (Hljóðverssmiðjur, Innrásin - stuðningur við tónleikahald innanlands, Kraumsverðlaunin & Kraumslistinn) auk stuðnings við verkefni Músíktilrauna Tónabæjar, Iceland Airwaves, Listahátíð í Reykjavík, Jazzhátíð í Reykjavík, Við Djúpið o.fl.

Verkefnin sem hlutu stuðning í seinni úthlutun Kraums 2011:

• Partíþokan: Prinspóló, Sin Fang, Borko og FM Belfast           500.000,-
  Innrás – Tónleikaferð á Seyðisfjörð, Akureyri, Ísafjörð og svo endað í Reykjavík
• Ghostigital og Captain Fufanu 400.000,-
  Innrás – Tónleikar víðsv.um landið í haust/vetur til að kynna raf- og tilraunatónlist
• Skálmöld         400.000,-
  Innrás/Útrás – Ferðin til Heljar: Tónleikar á Íslandi og í Færeyjum
• Valdimar          300.000,-
  Innrás – Tvær tónleikaferðir Valdimars um landið, í júlí og ágúst
• Hallveig Rúnarsdóttir og Gerrit Schuil            300.000,-
  Innrás - Þrennir ljóðatónleikar á landsbyggðinni: Ísafirði, Akureyri og Eskifirði
• Frelsissveit Nýja Íslands         300.000,-
  Innrás – Djasssveit Hauks Gröndals leikur tónlist eftir ísl. tónlistarfólk á Jazzhátíð í nýjum útsetningum

Samtals: 2.2 milljónir til sex verkefna

Kraumur tónlistarsjóður , sem var stofnaður í byrjun árs 2008 af Aurora velgerðarsjóði, hefur það meginhlutverk að efla íslenskt tónlistarlíf - fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Markmið Kraums er að styrkja stöðu tónlistarmanna á Íslandi með beinum styrkjum, aðstoð og samstarfi af ýmsu tagi. Kraumur vill styðja við og ýta undir nýsköpun og metnað á tónlistarsviðinu.

Kraumur og Aldrei fór ég suður standa fyrir tónlistarráðstefnu og fræðslunámskeiði á rokkhátíð alþýðunnar á Ísafirði um páskana. Opin öllum og engin aðgangseyrir.

Þriðja árið í röð stendur Kraumur tónlistarsjóður, í samvinnu við aðstandendur tónlistarhátíðarinnar Aldrei fór ég suður ,fyrir ráðstefnu og fræðunámskeiði á Ísafirði um páskana, 21.-23. apríl. Undanfarin tvö ár hefur verið farið um víðan völl á ráðstefnunum þar sem m.a. hefur verið komið inn á réttindi tónlistarmanna, tekjuleiðir og aðgengi almennings að tónlist á netinu.

Líkt og undanfarin ár munu hljómsveiti og listamenn sem koma fram á hátíðinni taka þátt í námskeiðinu. Meðal þeirra listamanna sem koma fram á hátíðinni í ár eru;

• Bjartmar Guðlaugsson og Bergrisarnir
• Ensími
• FM Belfast
• Grafík
• Jónas Sigurðsson og ritvélar framtíðarinnar
• Klassart
• Nýdönsk
• Páll Óskar
• Pétur Ben
• Prinspóló
• Valdimar
• … og fleiri

Frítt er inn á ráðstefnuna, og hún er öllum opin. Boðið upp á kaffi og með því. Sömuleiðis er ókeypis á hátíðina eins og undanfarin ár.

Tónlistarráðstefnur Kraums á Aldrei fór ég suður:

• Ég stend á skýi (2010)
• Hvar er draumurinn? (2009)

Tenglar
Heimasíða Aldrei fór ég Suður
Tónlistarráðstefna og námskeið Kraums á Aldrei fór ég suður

Tónlistarráðstefna og fræðsla Kraums á Aldrei fór ég suður 2010 – rokkhátíð alþýðunnar á Ísafirði

Kraumur tónlistarsjóður og aðstandendur tónlistarhátíðarinnar Aldrei fór ég suður héldu í sameiningu ráðstefnu og fræðslunámskeið um íslenska tónlist, þróun hennar og væntingar föstudaginn 2. apríl á Ísafirði. Þetta er í annað sinn sem Kraumur og skipuleggjendur hátíðarinnar leggja krafta sína saman með þessum hætti og líkt og í fyrra skiptið fór viðburðurinn fram í Edinborgarhúsinu samhliða hátíðinni.

Þátttakendur að þessu sinni voru um 60 manns, aðallega tónlistarmenn sem komu fram á Aldrei fór ég suður hátíðinni en auk þeirra voru margir áhugamenn um íslenska tónlist, heimamenn og gestir sem tóku virkan þátt í umræðunum.

Í ár voru málefni um hagsmuni tónlistarmanna mjög hugleikin, tónlistarútgáfa og það umhverfi sem menn búa við í dag! Utan um dagskrána hélt einn skipuleggjenda Aldrei fór ég suður, Kristján Freyr Halldórsson. Dagskráin var byggð af þremur meginpallborðum og voru 3 manns boðaðir í hvert pallborð. Umræðurnar voru opnar í báðar áttir og tóku allir mikinn þátt í skemmtilegum umræðum. Ráðstefnan og námskeiðið var í ár undir yfirskriftinni “Ég stend á skýi” sem flestum fannst viðeigandi…!

Dagskráin:

1. ALLIR ERU Í FÍNU FORMI

   Fyrsta umræðuefni dagsins var hin stafræna útgáfa sem tröllríður öllu. Er stafræn útgáfa fullgild útgáfa? Til að ræða þetta efni og reyna að svara þessum stóru spurningum voru fengin þau Haukur Viðar Alfrðsson  (í hljómsveitinni Morðingjum), María Rut Reynisdóttir (frá Gogoyoko) og Örn Elías (Mugison).

   Yfirskriftin var “Allir eru í fínu formi” og þar vitnað í Stuðmenn og Björgvin Halldórsson.

   Er stafræn útgáfa að verða viðurkennd útgáfa?
   Mugison reið á vaðið og sagði frá sinni reynslu en hann hóf að selja síðustu stóru plötu sína á netinu og bauð þar uppá niðurhal og fisíska útgáfan kæmi í framhaldi í pósti. Hann vildi meina að það hafi farið fram úr björtustu vonum, hann hafði talið að fáir þyrðu að nota netið á þennan hátt. Staðreyndin væri einfaldlega sú að miðlarnir hafa breyst svo hratt og iPod orðinn t.a.m. mjög eðlileg eign fólks.

   Haukur Morðingi taldi sinn áhangendahóp alls ekki að versla þeirra stöff á netinu, ekki vegna vankunnáttu frekar vegna þess að annar vettvangur hentar betur. Hann sjálfur notar vefinn ekki mikið til að kaupa tónlist.

   María Rut frá Gogoyoko upplýsti ráðstefnugesti um starfsemi Gogoyoko sem vakið hefur gríðarlega athygli. Vefurinn hefur vaxið gríðarlega og voru um 12.000 skráðir notendur á þessum tíma. Salan er að aukast og má segja að um 85% virkra tónlistarmanna séu með efni á vefnum. Að sama skapi er að aukast notkun vefjarins í Skandinavíu.

   Úr sal bárust spurningar um iTunes og hvers vegna sú þjónusta sé ekki í boði hér á landi. Hér eru IP tölur blokkaðar og forsjármenn tala um lítið markaðssvæði. Ráðstefnugestir töldu frekar að hagsmunamálin séu að flækja frekar og orsaka ekkert aðgengi hér.

   - Mugison hefur auðvitað selt gríðarmagn af plötum á netinu en peningarnir liggi alls ekki þar. Það er frekar að selja plötur og annan varning á tónleikum sem telur mun frekar.

   - Kristján Freyr skýtur því inn hvort það sé ekki áhyggjuatriði að ungt fólk í dag þekki ekki annað en að fá tónlist fría á netinu, margir nota frítt niðurhal á lagi í markaðssetningu sinni. Í framhaldi er spurt hvort mögulegt sé að “stór plata” sé að verða úrelt fyrirbæri og fólk hlusti bara á lag og lag hér og þar.

   - María segir ljóst að ungt fólk sé reiðubúið að greiða fyrir tónlist ef það veit að greiðslan skili sér til tónlistarmannsins. Einnig segir hún að unglingar séu ekki eini hópurinn sem er á vefnum, það kom glöggt í ljós þegar Hjálmar gáfu út plötu fyrir jólin. Þar sást líka að vefsalan kom ekki í veg fyrir að salan á plötunni sjálfri gengi vel. Á síðasta ári dróst sala á plötum á Íslandi um 4% á meðan netsala jókst umfram fisíska sölu á Bretlandi.

   - Haukur kom með þá hugmynd að menn gæfu út plötur sínar sem aðeins eitt lag (1 track) og kemst þá enginn upp með að stela bara einu lagi.

   - Mugisonsagðist hafa prófað að gefa allt stöffið sitt frítt í gegnum netið og þáði í staðinn netföng til að byggja upp tengslanet. Þar liggja mikil verðmæti. Mikilvægt að byggja upp gott samband við áhangendur sína.

   - María nefndi að tími svokallaðra stórstjarna í tónlist sé liðin og fleiri eigi uppá pallborðið, það se einmitt netinu að þakka. En þó að vefurinn sé þetta sterkur þá er jafnmerkilegt að vínillinn sé orðinn mjög vinsæll aftur.

   Þarna mynduðust gríðarlega áhugaverðar umræður og vakti inngrip Gríms Atlasonar mikla athygli. Hann benti á að símafyrirtækin fengju alltof miklar tekjur af allri þeirri tónlist sem fólk nálgast á netinu, það eru þessi fyrirtæki sem raunverulega eru að græða á tónlist í dag. Réttast væri að þau gæfu til baka á einhvern hátt og einnig ættu þau kannski að sjá til þess að opna megi fyrir aðgengi á Itunes og þau rukki þá fyrir notkunina.

   Útgangspunktur þessarar umræðu var kannski sá að við lifum á millibilstímum þar sem ekki er búið að fullslípa hvernig sölu á tónlist á internetinu skuli vera háttað. Hún er þó að þróast í rétta átt og öll form tónlistar færast nær miðjunni.

2. HVAR ERU PENINGARNIR MÍNIR?

   Hvernig er hagsmunum tónlistarmanna varið? Mikið hefur verið skeggrætt í minni hópum hvort þrfi að hrista upp í verkalýðsbaráttunni. Til að tæpa örlítið á þessum málum fengum við Högna Egilsson (Hjaltalín), Hall Jónsson (Bloodgroup) og Steinþór Helga (útgefanda og umboðsmann Hjaltalín).

   Hvar eru peningarnir mínir, kvað skáldið Einar Örn Benediktsson Sykurmola úr Ghostigital.

   - Kristján Freyr spurði hvort sú þráláta mýta sem væri uppi um að takmarkaður hópur valinkunnra poppara væru áskrifendur af stórum summum svokallaðra STEF-gjalda og fjárúthlutana annarra félaga ætti við rök að styðjast. Eða eru tónlistarmenn almennt illa upplýstir og þess vegna ekki að nýta rétt sinn?!

   - Steinþór taldi hvort tveggja vera rétt. Annars vegar er kerfið afar flókið og  alls ekki aðgengilegt, sérstaklega fyrir þá sem hafa ekki mikla reynslu.

   Útvarpsstöðvar skila inn til STEFS svokölluðum spilunarlistum en þar er á reiki hvort allt sé að koma þangað inn. Er það einungis partur af dagskrárgerð RÚV og Bylgjunnar og lítið annað?! Það virtist koma fram í máli Ólafs Páls Gunnarssonar á Rás 2 , á ráðstefnukvöldi ÚTÓN  á dögunum, að  alls ekki allt sem spilað er hjá þeim skli sér inn til STEFS.

   - Högni vill meina að yngri tónlistarmenn geri ekki of mikið í því að sækja rétt sín og kjör. Þeir eru jafnvel miklu virkari í spilamennsku en fá ekkert greitt. Þar kemur inn í dæmið að tónlistarmenn fylli ekki út tónleikaskýrslur eftir tónleika sína. Á móti kemur að staðirnir þurfi að greiða gjöld inn til STEFS en enginn sækir þá. Hvað verður um þessa peninga er ekki nógu skýrt. Svo virðist sem til sé samningur en svo er til “betri” samningur.

   - Hallur benti á að STEF væri auðvitað hagsmunafélag tónlistarmanna en félagið væri því miður ekki nægilega aðgengilegt, heimasíðan afar flókin og kerfið á allan hátt óskiljanlegt. Þar eru rangar áherzlur.

   - Steinþór ræddi um öll þessi félög hér á landi og önnur aðildarfélög: STEF, FTT, FÍH, NCG, ASCAP, SESAC, PRS, PPL… Svo er Samtónn hattur yfir öll félögin. Þetta væri of mikið og brýnt að skerpa línurnar. Svo vantar inn í dæmið félag sem heldur utan um flutningsrétt.

   - Grímur Atlason benti á úr sal að áherslurnar væru vissulega rangar. T.a.m. fengju lítil sveitarfélög úti á landi það oft óþvegið frá félaginu og þyrfti að borga himinháar fjárhæðir fyrir litlar uppákomur.

   - Kristján benti líka á að staðir af öllu tagi fengju orðsendingu frá STEFI ef  þeir auglýstu uppákomu einhvers staðar. Hinsvegar fengju tónlistarmenn aldrei áminningu um að skila inn tónleikaskýrslum, þá er þær uppákomur mjög oft auglýstar í blöðum.

   - Högni benti á að eitthvað væri gruggugt við þessar úthlutanir. Sér til stuðnings nefndi hann lag með Sprengjuhöllinni sem var vinslæasta lagið á Íslandi um langa hríð en hafi ekki skilað nema smárri upphæð í vasa höfundana.

   Lóst var að hægt var að ræða þessi mál endalaust og mönnum var heitt í hamsi þó svo að umræðan hafi aldrei farið á háa C-ið.

3. VIÐ GERUM OKKAR, GERUM OKKAR, GERUM OKKAR, GERUM OKKAR BESTA!

   Í þriðja og síðasta umræðugrundvelli okkar þennan dag ræddum við saman um hvernig landslag tónlistariðnaðurinn hefur skapað sér á Íslandi. Það er ljóst að tónlist skipar stórt hlutverk hér á landi og út a við. Talið er t.a.m. að það sem erlendir ferðamenn sækja hingað til lands sé einna helst landslagið eða auðnin og í öðru sæti er það tónlist og menning hverskonar. En hvernig er að „vinna“ við tónlist á Íslandi?

   Til þess að svara þessu fengum við Grím Atlason (sveitastjóra í Dalabyggð og umboðsmann FM Belfast og Retro Stefson), Birgi Örn Sigurjónsson (Bigga Bix tónlistarmann) og Láru Rúnars (tónlistarmann og innkaupastjóra Skífunnar)

   - Biggi sem býr á Ísafirði var að gefa út sína fyrstu plötu á dögunum. Hann getur ekki ímyndað sér né hefur hann væntingar um að vinna við tónlist. Fæstir gera það hér á landi og hafa það frekar sem sitt tómstundagaman.

   - Lára bætir við að ungir listamenn hendi sér oftar en ekki út í djúpu laugina og reyna að svamla að bakkanum án þess að vita réttu leiðina endilega.

   - Kristján bætir því við að það sé hugsanlega kostir og gallar við þá staðreynd. Það borgar sig alltaf að hafa leiðsögn en hinsvegar er það örugglega ástæðan fyrir því hversu framarlega við erum í menningu og listum sú staðreynd að við erum ekki að velta hlutunum mikið fyrir okkur, gerum bara!

   - Biggi er spurður hvernig það er að sinna tónlistinni á landsbyggðinni en ekki á höfuðborgarsvæðinu. Hann segir það engum vandkvæðum bundið, hann er nýbúinn að gefa út plötu og fékk henni dreift hjá útgáfu í Reykjavík og svo noti hann ferðir sínar suður til að spilaog kynna sig með einhverju móti. Svo er það auðvitað internetið sem er til staðar í dag en var ekki áður, það hefur minnkað heiminn.

   - Kristján Freyr spyr Grím Atlason hvort við getum borið okkur saman við nágrannaþjóðir og hvernig tónlistarumhverfið er í þeim samanburði.

   - Grímur hefur ferðast mikið uppá síðkastið og kynnst því umhverfi sem er í boði í Evrópu og Skandinavíu. Grímur skrifaði mjög fína grein á bloggsíðu sína á Eyjunni um þessi mál, greinin nefnist „Lifi tónlistin og Evrópa“ 04. Mars 2010, http://blog.eyjan.is/grimuratlason/2010/03/04/lifi-tonlistin-og-evropa/.

   Þar segir m.a. „..Út um alla Evrópu eru tónleikastaðir sem taka á móti listamönnum með gistingu, mat, góðum aðbúnaði og launum fyrir spilamennskuna. Hljómsveitir, sem eru að byrja í bransanum, njóta styrkja þannig að þær geti flutt sköpun sína og gert eitthvað uppbyggilegt. Hið vonda Evrópusamband styrkir spilastaðina þannig að þeir getir starfað árið um kring. Þeir eru ekki aðeins í stóru borgunum heldur líka í minni bæjum og jafnvel úr leið. Það er nefnilega skilningur á því að menning er hluti lífsgæða sem eru manneskjunni jafn mikilvæg og saltfiskur og skyr.”

   Okkur Íslendingum hefur ekki gengið vel í útrás með margt annað en menninguna. Bókmenntir voru okkar helstu afurðir hér áður en síðustu tvo áratugi hefur tónlistin skilað okkur meiri verðmætum en flestir gera sér grein fyrir. Hér er líka verið að tala um peningaleg verðmæti. Þrátt fyrir þetta leggjum við nær ekkert til þessarar greinar. Hljómsveitir sem eru að reyna að hasla sér völl hérlendis og erlendis njóta engra eða smánarlega lágra styrkja. Tónleikastaðir í Reykjavík skipta flestir um kennitölur á nokkurra missera fresti. Tónleikar á landsbyggðinni eru sjaldgæfur munaður og meistarar eins og Haukur á Græna hattinum eru upp á náð og miskunn leigusalanna komnir“.

   Grímur segir það skjóta skökku við að margar aðrar greinar skuli fá meira fjármagn en menning og listir, t.a.m. landbúnaður sem skilar ekki eins miklum tekjum og tónlist og menning. Hann segir jafnframt grátlegt á meðan hljómsveitir, jafnvel óþekktar, skuli ávallt fá greiðslur fyrir spilamennsku á stöðum í Evrópu þurfi íslenskar hljómsveitir að punga út greiðslum til að fá að spila á sumum stöðum. Oft þurfi jafnan að útvega hljóðkerfi og slíkt einnig. Í Danmörku sé virkur sjóður þar sem skemmtistaðir fá jafnan úthlutað úr til að greiða hljómsveitum fyrir spilamennsku.

   - Lára hefur unnið í Skífunni í nokkur ár og séð um innkaup fyrir þær verslanir. Nú sé hinsvegar að draga til tíðinda því Skífan mun loka verslun sinni við Laugaveg í sumar. Sú verslun er sú stærsta á Íslandi og það sé eflaust mikið reiðarslag fyrir tónlistarmenn og framleiðendur. Lára segir að tónlistarmenn þurfi enn frekar að vera á tánum til að lifa af eða að geta sinnt listinni. Menn þurfi að spila mikið til að kynna sig, selja inn á tónleika, selja ýmiskonar markaðsefni, boli og slíkt og reiða sig síður á mikla plötusölu. Enda ekki mikil plötusala í dag. Annars finnst Láru ekki vera mætt nógu vel á tónleika hér á landi.

   - Kristján vill meina að við megum vera heppin hér. Bæði er fólk duglegt að kaupa íslenska tónlist og það hafi virkilega aukist að fólk mæti á tónleika sérstaklega eftir efnahagshrunið.

   - Birgir tekur undir með tónleikamenningu. Fólk kunni vel að meta að það sé margt í boði. Biggi vill einnig undirstrika það að tónlistarmenn megi ekki gleyma því að ferðast út á land. Það sé mikilvægt að kynna tónlist sína allan hringinn en ekki bara í miðborg Reykjavíkur.

   - Grímur vill að menntamálaráðuneytið stuðli að því að Félagsheimilin verði nýtt betur í því samhengi. Rekstraraðilar þeirra húsa eiga að fá stærri fjárframlög til að reka þau hús með myndarskap, láta þau ekki grotna niður og geta aukinheldur gert vel við þá skemmtikrafta sem vilja heimsækja þessa staði.

   - Kristján tekur undir orð Gríms og segir mikilvægt fyrir alla byggð á landinu að geta tekið þátt í menningartengdri ferðamennsku. Félagsheimilin eru kannski undirstaðan að því öllu. Að lokum minnir hann einnig á að samkoman sem hann ávarpar sé stödd á hátíð sem spratt fram af einstaklingsfrumkvæði sem hefur gert mikið fyrir tónlist og menningu á Vestfjörðum.

4. SAMANTEKT

   Það var vel mætt á þessa ráðstefnu og námskeið okkar í ár. Bæði barst hróður síðasta málþings fyrir ári síðan og einnig hafði þetta verið vel kynnt í bænum. Það var því góð blanda af bæjarbúum, tónlistarmönnum sem spiluðu á hátíðinni og öðrum gestum. Allir þeir sem sátu í sal tóku virkan þátt í umræðunum frá byrjun, enda ítrekaði fundarstjóri það strax að þetta ætti ekki að vera formleg fundarsköp með þungum fyrirlestrum.

   Málefnin sjálf voru stór og því ekki mörg. Þau þurftu líka mikla umræðu og margar skoðanir komu fram. Stafræna útgáfan er auðvitað mjög hugleikin öllum í þessum iðnaði og morgunljóst að við lifum á miklum umbrotatímum í tónlistarútgáfu. Einnig fengum við fróðlega yfirferð á hagsmunabaráttunni. Menn hafa greinilega fengið mikla og aukna fræðslu í kjölfar fyrirlestrarkvölda hjá Útflutningsráði íslenskrar tónlistar. Fundarmenn höfðu það að orði.

   Það sem sat einna helst í mönnum eftir fundinn voru þeir punktar sem komu fram um stafrænt niðurhal og símafyrirtækin. Flestir voru mjög heitir í kjölfar þeirrar umræðu. Einnig hafði grein Gríms og hans úttekt á tónlistarlífinu í Evrópu mikil áhrif á mannskapinn.

   Á meðan fundi stóð fengu fundarstjóri og Örn Elías þau tíðindi að flugvél sem innihélt stóran hluta þeirra tónlistarmanna sem áttu að skemmta seinna um kvöldið hafi ekki farið af stað. Það fór um fundargesti því hátíðin var í húfi. Það var því ljóst að menn myndu yfirgefa fundarsalinn til þess að mæta á krísufund vegna slæms veðurs.

   Þegar fundi var slitið var öllum fundargestum boðið í plokkfiskveislu í Tjöruhúsið í Neðstakaupstað og fóru því flestir fagnandi úr salnum beint upp í rútu. Þess má einnig geta að krísufundurinn fór vel og Hjálmar, Ingó og veðurguðir mættu á sínum fjallabílum seinna um kvöldið og náðu að spila. Hinsvegar komust Pollapönk aldrei vestur.

   Lokaorðin hljóta að innihalda þakkarorð til þeirra sem lögðu hönd á plóg fyrir þetta málþing, sem bar yfirskriftina “Ég stend á skýi” og er þar auðvitað vitnað í ísfirðinginn Helga Björnsson sem svo sannarlega lét sig ekki vanta á hátíðina í ár sem endranær. Skipuleggjendum Aldrei fór ég suður, öllum sem tóku þátt í pallborðunum, öllum þátttakendum í sal og síðast en ekki síst samstarfs- og stuðningsaðilanum Kraumi-tónlistarsjóði sem hafði veg og vanda að því að gera okkur þetta kleift.

   Benjamín Mark Stacey og Kristján Freyr Halldórsson rituðu samantekt.

Yfir þúsund manns sóttu tónlistarhátíðina Eistnaflug á Neskaupsstað í júlí. Kraumur studdi við vinnusmiðjur og tónleikahald íslenskra sveita á hátíðinni.

Rokkhátíðin Eistnaflug var haldin í Neskaupstað sjötta árið í röð dagana 8.-10. júlí. Undirbúningur hátíðarinnar hófst í ágúst 2009 og að honum stóðu Stefán Magnússon, Guðný Lára Thorarensen og Haukur Dór Bragason. Fleiri hendur og sjálfboðaliðar bættust síðan við vinnuna þegar nær dró hátíðinni sjálfri.

Miðasala á Eistnaflug 2010 gekk vel, en samtals sóttu yfir þúsund manns hátíðina. Hljómsveitarmeðlimir og sjálfboðaliðar voru síðan rétt tæplega 200. Þegar allt er talið saman má reikna með að um 1.200 manns hafi komið í Neskaupstað á Eistnaflug 2010.

Samkvæmt skýrslu frá hátíðarhöldurum gekk hátíðin “í nær alla staði vel og er fátt hægt út á að setja.”

“Lögreglan var afar ánægð með skipulag hátíðarinnar sem og gesti. Gestirnir skemmtu sér í bróðerni og vinskap, en það er það sem Eistnaflug snýst um. Þeir fengu þó að kenna á veðrinu aðfararnótt fimmtudagsins 8. júlí og voru sumir kaldir og hraktir með allt sitt hafurtask rennblautt. Viðbúnaðurinn var ekki kominn almennilega í gang þegar þarna var komið við sögu og er það eitthvað sem verður að bæta fyrir Eistnaflug 2011. (…)

Án styrktaraðila okkar og annarrar hjálpar hefði Eistnaflug aldrei orðið að veruleika. Við færum þeim innilegar þakkir: Egilsbúð, Flytjandi, Ölgerðin, Hildigunnur hjá Fjarðabyggð, Signý hjá Menningarsjóði Austurlands, Helgi hjá Sýslumanninum á Eskifirði, Úton, Kraumur, Tónlistarsjóður ríkisins, Lögreglan, Björgunarsveitin Gerpir, Knattspyrnufélag Fjarðabyggðar og allt það góða fólk í Neskaupstað sem tekur Eistnaflugsförum opnum örmum.

Eistnaflug verður betra og stærra með hverju árinu sem og viðbúnaður þess, gæsla og gott orðspor. Á þeirri braut ætlum við að halda áfram.

Fyrir hönd Eistnaflugs og Millifótakonfekts ehf.,
- Stefán Magnússon, framkvæmdastjóri
- Guðný Lára Thorarensen, dagskrárstjóri
- Haukur Dór Bragason, kynningarstjóri”

Kraumur tónlistarsjóður er ánægður með samstarfið við Eistnaflug 2010 og stoltur af stuðningi sínum við tónlistarhátíðina sem lið í Innrás sjóðsins, sem miðar að því að styðja við tónleikahald á landsbyggðinni og gefa hljómsveitum og listamönnum færi á að spila og kynna tónlist sína sem víðast innanlands.

Kraumur studdi við vinnusmiðjur og tónleikahald íslenskra sveita á Eistnaflugi 2010.

Rokkveisla í hjarta Austurlands (Kraumur.is) - http://kraumur.is/2010/07/08/rokkveisla-i-hjarta-austurlands/

Hlekkir
Vefsíða Eistnaflugs - www.eistnaflug.is
Facebook síða Eistnaflugs - www.facebook.com/pages/Eistnaflug

Tónleikaferð K tríó um Ísland gekk feikivel.

Dagana 12.-19. júlí lék K tríó víðsvegar um landið í samstarfi við Kraum til að kynna nýja breiðskífu sína; Rekavið. Ferðin var hluti af Innrás Kraums sem miðar að því að styðja við tónleikahald innanlands og gefa listamönnum og hljómsveitum færi á að spila og kynna tónlist sína sem víðast. Það er skemmst frá því að segja að tónleikaferðin gekk vel og var hin besta kynning fyrir plötuna.

Frekari upplýsingar hér.

Trúbatrix í samvinnu við Kraum leita af nýjum tónlistarkonum fyrir tónleikaferð um landið og nýja safnplötu sumarið 2010.

Trúbatrixur eru komnar á kreik á ný eftir velheppnaðan tónleikaferð í vor til Bretlands  og eru nú að setja í gírinn fyrir sumarið 2010.  Er stefnan tekin á að fara í tónleikaferð um landið í ágúst  í samvinnu við Kraum tónlistarsjóð og gefa út nýja safnplötu; Trúbatrix Taka 2 stuttu eftir það. Platan fylgir eins og nafnið gefur til kynna í kjölfar Taka 1 sem innihélt m.a. lög frá; Pascal Pinon, Fabúla, Jara, Uni, Mysterious Marta, Elízu Newman og Myrra {mynd].

Trúbatrixur eru nú að leita af og auglýsa eftir nýjum og spennandi íslenskum tónlistarkonum til að taka þátt í tónleikaferðinni og plötunni í sumar;

“Ef þið flytjið frumsamda tónlist og getið komið fram og flutt 3-4 lög á tónleikum  endilega vera í sambandi. Allmenningur er líka kvattur til að benda á efnilegar tónlistarkonur og því fjölbreyttari tónlist  því betra!

Tónlistarkonur geta sent tengil á vefsíðu eða mp3 með tóndæmi  á  :

trubatrix@gmail.com

og við verðum svo í sambandi !”

Hlekkir
Trúbatrix á MySpace
Trúbatrix á Facebook
Kraumur - Innrás

Listahátíðin LungA á Seyðisfirði fagnar tíu ára afmæli sínu með einstaklega glæsilegri tónlistardagskrá á hátíðinni í ár þar sem fram koma Hjaltalín, Retro Stefson, Bloodgroup ásamt strengjasveit, Seabear, Miri og fleiri.

Listahátíðin LungA á Seyðisfirði fagnar tíu ára afmæli sínu með einstaklega glæsilegri tónlistardagskrá á hátíðinni í ár. Tónlistardagskráin nær hápunkti sínum á afmælistónleikum laugardaginn 17. júlí þegar miðbæjarsvæði Seyðisfjarðar verður breytt í eitt samfellt hátíðarsvæði þar sem tvö útisvið verða með stanslausa tónlist allan daginn fram til klukkan 01.00.

LungA - Listahátíð ungs fólks, Austurlandi hófst mánudaginn 12. júlí og stendur fram til sunnudagsins 18. júlí. Á boðstólum hátíðarinnar eru fjöldi listasmiðja og listasýninga, fatahönnunarsýning, fyrirlestrar, tónleikar og fleiri viðburðir.

LungA var fyst haldin árið 2000 og að því tilefni er aðgangseyrir á tónleikana aðeins 2.000 krónur. Aðstandendum LungA er mikil ánægja að tilkynna að 15 ára og yngri fá aðgang í fylgd með fullorðnum - og fólk 50 ára og eldra fær frítt inn á tónleikana - og hvetur alla fjölskylduna til að mæta og njóta frábærrar tónlistar saman!

Kraumur tónlistarsjóður er samstarfsaðili tónleikadagskrárinnar og styður sérstaklega upptökur á afmælistónleiknum. Kraumur hefur það meginhlutverk að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan.

_____________________________________________________________

Tónleikar Kimi Records - Föstudaginn 16. júlí
Tónleikarnir fara fram í Herðubreið. Miðaverð 1.000 krónur. Aldurstakmark 18 ár.

Herðubreið – dagskrá hefst klukkan 21:00
Tape Tud (BE)
Kimono
Sudden weather change
Stafrænn Hákon
Quadruplos

Eftirpartý Öldunnar
Retro Stefson (dj set)
Miri (dj set)

Afmælistónleikar LungA 2010 laugardaginn 17. júlí
Tónleikarnir verða utandyra í miðbæ Seyðisfjarðar. Miðaverð kr. 2000. Frítt fyrir fimmtíu ára og eldri, 15 ára og yngri verða að vera í fylgd með fullorðnum.

Stóra svið – dagskrá hefst klukkan 19:30
Hjaltalín
Bloodgroup ásamt strengjasveit
Seabear
Retro Stefson
Helmus und Dalli
Miri

Litla svið – dagskrá hefst klukkan 16:00
Óli Ofur
Oculus
(Cassette)
DJ flugvel og geimskip
Muted / Hypno

Ball Öldunnar með Hjálmum - dagskrá hefst klukkan 01.00
Tónleikarnir fara fram í Herðubreið. Miðaverð 2.500 krónur. Aldurstakmark 18 ár.
Hjálmar

_____________________________________________________________

Miðasala
Forsala á Afmælistónleika Lunga fer fram á midi.is og í verslun Skífunnar Kringlunni til og með föstudagsins 16. Júlí. Afhending armbanda fer fram í Herðubreið miðvikudag og fimmtudag klukkan 16-19, föstudag klukkan 13-19 og laugardag frá klukkan 13:00. Þeir sem kaupa sér armband á Afmælistónleikana fá miðann á Hjálmaballið á 1500kr og frítt inn á föstudags partýið gegn framvísun armbandsins. Miðasala á einstaka viðburði fer fram við hurð - en frítt er á fjölmarga viðburði.
_____________________________________________________________

Hlekkir
Heimasíða - www.lunga.is
LungA á Facebook - Facebook LungA
Innrás Kraums tónlistarsjóðs - Kraumur/Innrás

Tónlistarhátíðin Eistnaflug fer fram í Neskaupsstað dagana 8.-10. júlí þar sem yfir 30 hljómsveitir koma fram, auk þess sem boðið verður upp á vinnusmiðjur og tónleika utan hefðbundnar dagskrár í fyrsta sinn í sögu hátíðarinnar.

“Ef að þú manst eftir Eistnaflugi - þá varstu ekki þar”
- Guðmundur Óli Pálmason

“Eistnaflug? Betra en Arnarflug!”
- Magnús “Zombie”

Búast má við að íbúafjöldi Neskaupsstaðar tvöfaldist dagana 8.-10. júlí þegar tónlistarhátíðin Eistnaflug fer fram í bænum. Hátíðin hefur verið haldin árlega frá árinu 2005 og vaxið með hverju árinu. Nú er svo komið að Eistnaflug er orðin ein helsta tónlistarhátíð landsins. Yfir 30 hljómsveitir koma fram á Eistnaflugi um helgina, auk þess sem boðið verður upp á vinnusmiðjur og tónleika utan hefðbundnar dagskrá í fyrsta sinn í sögu hátíðarinnar.

Kraumur tónlistarsjóður styður við vinnusmiðjur og tónleikahald íslenskra sveita á Eistnaflugi 2010. Stuðningurinn og samstarfið er hluti af Innrásar-átaki sjóðsins til stuðnings tónleikahaldi innanlands. Fjölmargar hljómsveitir og listamenn hafa notið stuðnings og samstarfs í tengslum við Innrásina frá árinu 2008, má þar nefna; Amiina, Árstíðir, Benni Hemm Hemm, Benny Crespo’s Gang, Bloodgroup, Borko, Dr. Spock, Elfa Rún Kristinsdóttir, Elín Ey, Elíza Geirsdóttir Newman, Fabúla, FM Belfast, Melkorka Ólafsdóttir, Momentum, Morðingjarnir, Mógil, Mysterious Marta, Myrra, Njútón, Nögl, Pascal Pinon, Reykjavík!, Sign, Skátar, Svavar Knútur og Sykur.

Eistnaflug var fyrst haldin árið 2005 þegar Stefán Magnússon, sem leiddist rokkleysið eftir að hafa flutt til Neskaupstaðar, skipulagði tónleika með 14 hljómsveitum og bauð vinum sínum til Neskaupstaðar í lok sumarsins. Árið eftir var hátíðin haldin aðra helgina í júlí og sú hefð hefur haldist síðan. Eistnaflug hefur vaxað og dafnað með árunum, og getið sér góðs orðspor hérlendis sem erlendis. Eistnaflug byrjaði sem lítil metal-rokkhátíð er í dag 3-daga tónlistarhátíð sem samanstendur af ýmsum tónlistarstraumum og stefnum - þó rokktónlist af harðari gerðinni sé enn aðalsmerki hennar.

Fyrsta hátíðin stóð yfir eina kvöldstund og mættu um  50 manns, 300 manns mættu árið eftir þegar hátíðin stækkaði í 2-daga festival og árið 2008 tók hátíðin nokkrum stakkaskiptum þegar hún stóð í fyrsta sinn yfir í 3 daga og erlend hljómsveit (Contradiktion frá Þýskalandi) spilaði þar í fyrsta sinn. Gestir það árið voru 800 manns og í fyrra náði gestafjöldi nýjum hæðum þegar um 1.000 manns sóttu hátíðina. Í ár er búist við svipuðum fjölda og í fyrra, og þar sem einhverjir miðalausir gestir fylgja alltaf með í bæinn má búast við að íbúafjöldi Neskaupsstaðar (sem er um 1.400) nærri tvöfaldist því þessa helgi.

Yfir 30 hljómsveitir koma fram á Eistnaflugi 2010. Má þar nefna Dr. Spock, Mínus, Reykjavík!, Cliff Clavin, Saktmóðigur, In Memorium, Fortíð, Beneath, Momentum, Celestine, Sólstafir sem léku á nýafstaðinni Hróaskelduhátíð, Sororicide sem koma saman á ný og Kolrassa Krókríðandi sem snýr aftur eftir langt hlé með með Elízu Newman í fararbroddi. Erlendir gestir í dagskrá hátíðarinnar er eitt af flaggskipum þungarokksins; engir aðrir en Napalm Death frá Englandi.

Eistnaflug hefur getið sér gott orð fyrir vinalegt andrúmsloft og góða stemmningu. Hátíðin er haldin í Neskaupstað, hjarta Austurlands, nánar tiltekið í Egilsbúð. Gistiaðstaða er á tveimur tjaldsvæðum; hinu svokallaða ‘djammstæði’ við enda bæjarins og á fjölskyldutjaldstæðinu í hlíðinni ofan við miðbæinn. 18 ára aldurstakmark er á hátíðina sjálfa.

Forsala miða á midi.is og í verslunum Skífunnar og er verð í forsölu er aðeins 6.666 krónur. Miðar eru einnig seldir á Nesk 7.500 á Neskaupsstað.

Hlekkir
Vefsíða Eistnaflugs - www.eistnaflug.is
Facebook síða Eistnaflugs - www.facebook.com/pages/Eistnaflug

Tónlistarhátíðin Við Djúpið fer fram á Ísafirði dagana 22.-27. júní. Kraumur, Rás 1 og aðstandendur hátíðarinnar Leita að nýjum tónskáldum og verða verk þeirra flutt næstkomandi sunnudag.

Tónlistarhátíðina Við Djúpið stendur nú sem hæst á Ísafirði. Hátíðin er nú haldin í áttunda sinn og fer fram dagana 22. - 27. júní. Um helgina hefst síðasta námskeið hátíðarinnar er það er nýjung: námskeið fyrir píanókennara í notkun spuna í kennslu í klassísku píanónámi.

Mikil og góð aðsókn hefur verið á þá tónleika sem hátíðin hefur staðið fyrir sem afer; “fullt út úr dyrum” að sögn skipuleggjenda. Hátíðin nær hámarki nú undir helgi og má búast við miklum fjölda gesta.

Við Djúpið hefur frá upphafi haft þá sérstöðu að leggja áherslu á viðamikið og metnaðarfullt námskeiðahald samhliða því að bjóða upp á tónleika á heimsmælikvarða alla daga hátíðarinnar.

Við Djúpið, Rás 1 og Kraumur standa fyrir Leit að nýjum tónskáldum á og í tengslum við hátíðina. Dómnefnd valdi á dögunum þrjú nýjum tónskáldum hefur verið boðin þátttaka í verkefninu í sumar. Í kjölfarið skrifuðu þau verk fyrir blásarakvintett sem verða  frumfluttur á hátíðinni sunnudaginn 27. júní og síðar útvarpað á Rás 1.

Tónskáldin eru;

• FINNUR KARLSSON
• HALLVARÐUR ÁSGEIRSSON
• PETTER EKMAN

Þetta er í annað sinn sem verkefnið fer fram, en í fyrra sömdu þrjú tónskáld verk fyrir kammersveitina Ísafold. Nú er komið að blásarakvintett Nordic Chamber Soloists að flytja verkin, en hann er skipaður ungum en mjög reyndum tónlistarmönnum frá norður Evrópu.

Tilgangur verkefnisins er að gefa ungum tónskáldum tækifæri til að vinna mjög náið með reyndum tónlistarmönnum, mun nánar en undir venjulegum kringumstæðum. Verkin verða síðan frumflutt á sérstökum lokatónleikum tónlistarhátíðarinnar Við djúpið á Ísafirði, 27. júní 2010.

Frekari upplýsingar

• Kraumur.is - Leit að nýjum tónskáldum ber árangur
• Kraumur.is - Leit að nýjum tónskáldum
• Við Djúpið heimasíða

Plakat frá tónleikaferð Amiina kemur í leitirnar.

Skemmtilegt plakat frá tónleikaferð Amiina um landið sumarið 2009, sem farin var í samvinnu við og með stuðningi Kraums, er komið í leitirnar á stafrænu formi. Ekki úr vegi að smella því á síðuna.

Frekari upplýsingar um tónleikaferðina má finna hér. Frekari upplýsingar um Innrás Kraums - stuðning við tónleikahald innanlands má finna hér. Fleiri plaköt frá viðburðum í tengslum við starfsemi Kraums má finna hér.

Kammerkórinn Carmina stendur í ströngu við tónleikahald um þessar mundir með stuðningi Kraums.

Carmina hélt tvenna tónleika á Listahátíð í Reykjavík 15. og 16. maí sl. við frábærar undirtektir í þétt settinni Kristskirkju, og sagði Ríkarður Örn Pálsson í gagnrýni sinni í Morgunblaðinu að unaður hefði verið að hlýða á vel samstilltan söng hópsins.

Á döfinni eru tónleikar bæði innanlands og utan, á tónlistarhátíðinni Við Djúpið á Ísafirði í lok júní og á þýsku tónlistarhátíðinni Wege durch das Land þann 10. júlí.  Á báðum hátíðunum mun Carmina flytja blöndu af erlendri endurreisnartónlist (eftir Josquin des Prez, Tomás Luis da Victoria og Cristobál de Morales) og úr íslenskum nótnahandritum, Melódíu frá um 1650 og Hymnodia sacra frá árinu 1742.

Þá hefur hópnum verið boðið að koma fram á Spitalfields-tónlistarhátíðinni í Lundúnum og er stefnt að tónleikum þar 15. desember nk.  Auk þess er áformað að halda útgáfutónleika í Reykjavík og hugsanlega víðar, en nýr geisladiskur Carminu, Hymnodia sacra, er væntanlegur á markað í sumar.

Rúmum tíu milljónum var veitt til 22 verkefna á sviði íslenskrar tónlistar. Kraumur tónlistarsjóður kynnti á fimmtudag (15. apríl) fyrstu úthlutanir sínar og stuðning við íslenskt tónlistarlíf, tónlistarmenn og hljómsveitir fyrir árið 2010.

Tuttugu listamenn og hljómsveitir hljóta beinan stuðning frá Kraumi og samstarf við verkefni sín á árinu; Bang Gang, Bloodgroup, Bryndís Jakobsdóttir, Daníel Bjarnason, Einar Scheving, Feldberg, FM Belfast, Hafdís Bjarnadóttir, Kammerkórinn Carmina, K-tríó, Leaves, Mammút, Ourlives, Ólöf Arnalds, Retro Stefson, Samúel Jón Samúelsson Big Band, Seabear, Sólstafir, Trúbatrix hópurinn og Víkingur Heiðar Ólafsson. Kraumur mun jafnfram halda áfram með eigin verkefni; m.a. að styðja við íslenska plötuútgáfu verðlauna framúrskarandi árangur á því sviði með Kraumslistanum - sem og halda Hljóðverssmiðjur í sumar með ungum og upprennandi hljómsveitum og listamönum.

Samtals er nú verið að veita 10,8 milljónum til margvíslegra verkefna á sviði íslenskrar tónlistar. Alls bárust 208 umsóknir í nýliðnu umsóknarferli. Yfir 180 umsóknir hlutu ekki styrk eða stuðning Kraums, og ljóst að mikill fjöldi flottra og verðugra verkefna hlutu ekki stuðning að þessu sinni. Yfirlýst stefna sjóðsins er að styrkja tiltölulega fá verkefni/listamenn, en gera það þannig að stuðningurinn sé afgerandi.

Áhersla er lögð á kynningu á íslenskri tónlist og verkum íslenskra listamanna á erlendri grundu í stuðningi Kraums að þessu sinni - auk stuðning við starfsemi listamanna og hljómsveita hérlendis; allt frá vinnu við lagasmíðar og upptökur á eigin verkum, til námskeiða og tónleikahalds á landsbyggðinni.

Kynningin og úthlutunin fór fram fimmtudaginn 15. apríl á Kaffi Rósenberg, einum helsta tónleikastað Reykjavíkurborgar. Þórunn Sigurðardóttir stjórnarformaður Kraums bauð fólk velkomið og greindi jafnframt frá því að vegna anna væri hún að hætta í stjórninni, eftir að rúmlega tveggja ára farsælt starf fyrir sjóðinn og hafa átt stóran þátt í að koma honum á laggirnar og leggja línurnar í starfsemi hans.  Pétur Grétarsson varaformaður tók við stjónarformennskunni. Eldar Ástþórsson framkvæmdastjóri Kraums greindi frá verkefnum sjóðsins og úhlutunum. Loks tóku Retro Stefson og Feldberg lagið við góðar undirtektir viðstaddra.

KYNNING Á ÍSLENSKRI TÓNLIST Á ERLENDUM VETTVANGI
Stærstu samstarfsstyrkina að þessu sinni fá hljómsveitin FM Belfast, við tónleikahald og kynningu á verkum sínum erlendri gundu, og tónskáldið Daníel Bjarnason við eftirfylgni og kynningarstarf á breiðskífu sinni Processions á alþjóðvettvangi. Kraumur styður bæði verkefnin um 1.000.000 króna hvort. Kraumur efnir sömuleiðis til samstarfs og stuðnings við Feldberg, Mammút, Ourlives, Ólöf Arnalds, Seabear, Samúel Jón Samúelsson Big Band og Sólstafir við að koma sér og verkum sínum á framfæri erlendis.

Daníel Bjarnason er klassískt tónskáld sem verið hefur iðinn við að brjóta niður þá múra sem tengjast slíkri nafnbót. Það má segja að Daníel sé að sumu leyti að feta nýja slóð fyrir klassísk tónskáld á okkar tímum og koma klassískri tónlist til breiðari hóps áheyranda. Procession er þegar farin að fá góða dóma og viðtökur á alþjóðavettvangi og með frekari kynningu og tónleikahaldi nær hún vonandi eyrum enn fleiri.

Hljómsveitin FM Belfast er á öðrum enda tónlistarlitrófsins, leikur dans- og popptónlist, og hefur vaxið gríðarlega sem tónleikasveit síðan hún kom fyrst fram á Iceland Airwaves hátíðinni árið 2006. Sveitin gerði og gaf út sína fyrstu breiðskífu, How to Make Friends, með stuðningi Kraums árið 2008 og síðan hefur orðspor sveitarinnar farið langt út fyrir landsteinana. Árið 2010 ætlar sveitin að leggja áherslu á útlönd og mun sveitin m.a. koma fram á tónlistarhátíðum og bransasamkomum víð um Evrópu, m.a. Hróaskeldu og SPOT.

Íslenskir listamenn hafa í áraraðir unnið gríðarlega mikilvægt starf við að kynna Ísland og íslenska menningu á erlendri grundu. Markaðir í Skandinavíu, annarstaðar í Evrópu og Bandaríkjunum eru mikilvægir íslenskum listamönnum við að skapa sér tekjur af verkum sínum og þar eru margvísleg sóknarfæri fyrir íslenska listamenn. Kraumur vill hlúa að og styðja við útrás íslenskra listamanna og hljómsveita - og vonar að stuðningurinn nýtist þessum listamönnum til að koma sér og sínum afurðum enn frekar á framfæri, skapi þeim aukin tækifæri - sem og íslenska tónlist almennt - á erlendum vettvangi.

PLÖTUGERÐ OG INNLEND VERKEFNI
Kraumur heldur áfram að styðja við verkefni listamanna og hljómsveita hérlendis við að lagasmíðar, upptökur og við að útgáfu á verkum sínum. Kraumur efnir til samstarfs og stuðnings við Bang Gang, Bryndísi Jakobsdóttir, Einar Scheving, Hafdísi Bjarnadóttir, Leaves, Retro Stefson og Víking Heiðar Ólafsson við verkefni sín á sviði lagasmíða, vinnu, útgáfu og/eða kynningu á eigin verkum. Allir þessir listamenn stefna á að gefa út nýjar breiðskífur á árinu.

Kraumur heldur Innrásinni - stuðningi sínum við tónleikahald innanlands - áfram á árinu. Markmið Innrásarinnar er að auka við möguleika listamanna til tónleikahalds, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni. Fjölmargir listamenn og hljómsveitir hafa lagt land undir fót og haldið tónleika víðsvegar um landið síðustu tvö ár undir merkjum Innrásarinnar og má þar nefna tónleika; Amiina, Árstíðir, Benni Hemm Hemm, Dr. Spock, Elfa Rún Kristinsdóttir, Melkorka Ólafsdóttir, Momentum, Muck, Nögl, Reykjavík!, Sign, Skátar, Sudden Weathar Change, Svavar Knúts Kristinssonar og fjölda annarra.

Innrás Kraums mun styðja við tónleika og tónleikaferð Kammerkórsins Carmina, K-tríó, Trúbatrix hópsins (Myrra Rós Þrastardóttir, Miss Mount, Elín Ey, Elíza, Pascal Pinon, Mysterious Marta og fjöldi annara tónlistarkvenna) og Bloodgroup í Reykjavík og á landsbyggðinni. Blodgroup mun sömuleiðis standa fyrir tónleikum í Færeyjum með stuðningi Kraums. Tími til komin að þakka Færeyjingum fyrir hjálpina með því að færa þeim frábæra tónlist frá Íslandi.

KRAUMSLISTINN OG STARFSEMIN 2010
Kraumur hefur það sem af er þessu ári staðið fyrir námskeiði og opinni ráðstefnu fyrir tónlistarmenn og tónlistaráhugamenn á og í samvinnu við Aldrei fór ég suður, staðið fyrir Leit að ungum tónskáldum í samstarfi við Við djúpið og Rás 1 og sem einn samstarfsaðila Músíktilrauna í mars valið þrjár hljómsveitir til þátttöku í Hljóðverssmiðjum Kraums - þar sem ungum og upprennandi hljómsveitir fá fræðslu, handleiðslu og aðstöðu til að taka upp eigð efni með aðstoð fagmanna.

Kraumur hefur sömuleiðis keypt (100 stk af hverjum titli) og kynnt þær sex hljómplötur sem hlutu viðurkenningu Kraumslistans 2009 (áður Kraumsverðlaun) - meðal annars með útsendingum á tónleikahaldara, plötuútgáfur og tengiliði erlendis. Plöturnar eru; Anna Guðný Guðmundsdóttir - Vingt regards sur l’enfant-Jésus, Bloodgroup - Dry Land, Helgi Hrafn Jónsson - For the Rest of my Childhood, Hildur Guðnadóttir - Without Sinking, Hjaltalin - Terminal og Morðingjarnir - Flóttinn mikli. Kraumslistinn 2010 verður kynntur í desember í ár og mun Kraumur veita þeim plötum sem hljóta viðurkenningu samskonar stuðning.

KRAUMUR OG NÚVERANDI ÚTHLUTUN
Kraumur er sjálfstætt starfandi sjóður og starfsemi á vegum Auroru velgerðarsjóðs sem hefur það að meginhlutverk að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Markmiðið er að styrkja stöðu ungra tónlistarmanna á Íslandi með beinum styrkjum, faglegri aðstoð og samstarfi af ýmsu tagi. Starfsemin, og stuðningurinn við listamenn og hljómsveitir, samanstendur því af bæði fjárhagslegum stuðning sem og faglegri aðstoð, aðgang að tengslaneti og hjálp við að koma verkum sínum og verkefnum í framkvæmd.

Kraumur tónlistarsjóður er á sínu þriðja starfsári, en starfsemin var sett á laggirnar í upphafi árs 2008. Á síðastliðnum 2 árum hefur Kraumur unnið með og stutt fjölda listamanna og hljómsveita með ýmsum hætti. Má þar nefna; Amiina, Benny Crespo’s Gang, Bloodgroup, Dikta, Dr. Spock, Celestine, Elfa Rún Kristinsdóttir, FM Belfast, For a Minor Refleciton, Helgi Valur, Hjaltalín, Lay Low, Melkorka Ólafsdóttir, Mugison, Morðingjarnir, Momentum, Mógil, Nordic Affect, Njútón, Nögl, Ólöf Arnalds, Ólafur Arnalds, Reykjavík!, Seabear, Sin Fang Bous, Sign, Skakkamanage, Skátar, Sudden Weather Change, Svavar Knútur, Sykur, Trúbatrix, Víkingur Heiðar Ólafsson og fjölmargir fleiri.

Kraumur kynnir að þessu stuðning alfarið ný samstarfsverkefni við listamenn, ef frá er talin stuðningur við FM Belfast og Ólöfu Arnalds - en Kraumur hefur áður stutt við plötugerð viðkomandi listamanna og tekur nú þátt í kynningu á verkum þeirra á erlendum vettvangi. Trúbatrix hópurinn fékk stuðning í fyrra við tónleikahald og Bloodgroup hlaut árið 2008 stuðning við tónleikahald ásamt fleiri hljómsveitum. Kraumur telur mikilvægt að fá inn ný verkefni - en jafnframt að vinna áfram með hluta þeirra listamanna sem hlotið hafa stuðning að verkum þeirra og stefnir á að gera það áfram.

Alls bárust 208 umsóknir í umsóknarferli sjóðsins sem nú er nýliðið. Yfir 180 umsóknir hlutu ekki styrk eða stuðning Kraums, og er ljóst að mikill fjöldi flottra og verðugra verkefna hlutu ekki stuðning að þessu sinni. Stjórn Kraums er hins vegar ánægð með þann stuðning og þau flottu verkefni sem tilkynnt er um nú sem sjóðurinn mun standa með og á bakvið. Yfirlýst stefna sjóðsins er að styrkja tiltölulega fá verkefni/listamenn, en gera það þannig að stuðningurinn sé afgerandi.

—————————————————————————————————————————————————
—————————————————————————————————————————————————

YFIRLIT

ÚTRÁS
Stuðningur og samstarf við listamenn og hljómsveitir við að koma sér og verkum sínum á framfæri á erlendum vettvangi.

INNRÁS
Stuðningur og samstarf við listamenn og hljómsveitir við tónleikahald innanlands.

PLÖTUGERÐ OG INNLEND VERKEFNI
Stuðningur og samstarf við listamenn og hljómsveitir á sviði lagasmíða, plötugerðar og kynningar.

EIGIN VERKEFNI KRAUMS
Eigin verkefni og samstarfsverkefni Kraums tónlistarsjóðs.

—————————————————————————————————————————————————
—————————————————————————————————————————————————

Kraumur óskar hljómsveitinni Of Monsters and Men til hamingju með sigur í Músíktilraunum 2010 og býður sveitinni sæti í Hljóðverssmiðjur Kraums.

Hljómsveitinni Of Monsters and Men bar sigur úr bítum í hinni árlegu tónlistarhátíð og hljómsveitakeppni Músiktilraunir 2010. Sem sigursveit keppninar mun hún, ásamt Vulgate, sem lenti í 2. sæti, og The Assassin of a Beautiful Brunette, sem lenti í 3. sæti, fá sæti í HljóðverssmiðjumKraums í sumar.

Markmiðið með Hljóðverssmiðjunum er að styðja við grasrótina í íslensku tónlistarlífi, miðla reynslu og gefa ungum og upprennandi tónlistarmönnum tækifæri á að taka upp efni sem nýst getur við kynningu (t.a.m. dreifingar á netinu og til útvarpsstöðva) og/eða sem byrjun á upptökum á breiðskífu.

Þetta er í annað sinn sem Kraumur verðlaunar hljómsveitirnar sem lendar í fyrstu þrem sætunum á Músíktilraunum. Í kjölfar Músiktilrauna 2009 var Bróðir Svartúlfs, Ljósvaga og The Vintage boðin þátttaka í Hljóðverssmiðjum 2009 sem fram fóru í Tankinum á Ísafirði þar sem leiðbeinendur voru Mugison (Örn Elías Guðmundsson) tónlistarmaður, Páll Ragnar Pálsson tónlistarmaður með BA í Tónsmíði frá Listaháskóla Íslands og Önundur Hafsteinn Pálsson, tónlistarmaður, upptökumaður og tónlistarkennari á Ísafirði og Flateyri.

Músikiltraunir hefur verið einn helsti vettvangur ungra íslenskra tónlistarmanna til að koma sér og tónlist sinni á framfæri í yfir 25 ár, og hefur samstarf Kraums og Músiktilrauna verið mjög farsælt. Listi hljómsveita og listamanna sem borið hafa sigur úr bítum á Músíktilraunum er langur. Meðal sigurvegara keppninar - sem haldin hefur verið árlega frá 1986 - eru; Greifanir, Kolrassa Krókríðandi/Bellatrix, Maus, Botnleðja, Stjörnukisi, Mínus, XXX Rottweiler, Mammút, Jakobínarína, Agent Fresco og nú síðast Bróðir Svartúlfs.

Kraumur styður við sigurvegara Músíktilrauna 2009 og sveitirnar sem lenda í 2. og 3. sæti með plássi í Hljóðverssmiðjum Kraums og Tanksins á Flateyri [mynd]. Um er að ræða eina vika í hljóðverinu, samtals 70 upptökutíma með hljóðmanni, auk leiðbeininga og kennslu frá reyndari listamamönnum. Gisting innifalin.

Tenglar:
Músíktilraunir - heimasíða
Hljóðverssmiðjur Kraums

Fjöldi umsókna um þátttöku barst í samkeppni tónlistarhátíðarinnar Við Djúpið, Kraums tónlistarsjóðs og Ríkisútvarpsins Rás 1 um Leitina að nýjum og ungum tónskáldum.

Dómnefnd hefur nú komist að niðurstöðu í samkeppninni. Þremur tónskáldum hefur verið boðin þátttaka í verkefninu í sumar. Þau hefjast nú handa og skrifa verk fyrir blásarakvintett sem verður frumfluttur á Ísafirði 27. júní í sumar.

Tónskáldin eru;

• FINNUR KARLSSON
• HALLVARÐUR ÁSGEIRSSON
• PETTER EKMAN

Þetta er í annað sinn sem verkefnið fer fram, en í fyrra sömdu þrjú tónskáld verk fyrir kammersveitina Ísafold. Nú er komið að blásarakvintett Nordic Chamber Soloists að flytja verkin, en hann er skipaður ungum en mjög reyndum tónlistarmönnum frá norður Evrópu.

Tilgangur verkefnisins er að gefa ungum tónskáldum tækifæri til að vinna mjög náið með reyndum tónlistarmönnum, mun nánar en undir venjulegum kringumstæðum. Verkin verða síðan frumflutt á sérstökum lokatónleikum tónlistarhátíðarinnar Við djúpið á Ísafirði, 27. júní 2010.

Tenglar:
Kraumur.is - Leit að nýjum tónskáldum
Við Djúpið - heimasíða

Kraumur tónlistarsjóður stendur annað árið í röð fyrir námskeiði og fyrirlestrum fyrir tónlistarmenn, og allt áhugafólk um tónlist, á Aldrei fór ég suður á Ísafirði - rokkhátíð alþýðunnar um páskana.

Tónlistarhátíðin Aldrei fór ég suður fer fram í níunda sinn dagana 1.-4. apríl 2010. Kraumur tónlistarsjóður, í samvinnu við aðstandendur hátíðarinnar, stendur annað í röð fyrir ráðstefnu eða málþingi fyrir tónlistarmenn, sem og allra aðra áhugamenn um íslenska tónlist, á meðan á hátíðinni stendur.

Yfirskrift ráðstefnunnar í fyrra var Hvar er draumurinn? þar sem ýmsir reynsluboltar úr íslensku tónlistarlífi létu gamminn geysa. Fjölbreytt dagskrá varí boði þar sem meðal annars var komið inn á textagerð, hvernig best er að koma sér og tónlist sinni á framfæri - og að sjálfsögðu hvernig á að slá í gegn.

Ráðstefnan var vel sótt, bæði af tónlistarmönnum og tónlistarunnendum, jafnt heimamönnum sem fólki sem annarstaðar af landinu.

Ráðstefnan í ár mun koma inn ýmis viðfangsefni sem íslenskir tónlistarmenn og íslenskt tónlistarlíf er að fást við. Meðal spurninga sem varpað verður fram og unnið nánar með eru;

• Er stafræn útgáfa, fullgild útgáfa?
• Hvernig er landslagið í tónlistarheiminum í dag, er Ísland á kortinu
• Er hægt að lifa af músíkinni einni saman?
• Hver eru áhrif minnkunar opinbers stuðnings til tónlistar?

Násmskeiðin og smiðjurnar fara fram í Edinborgarhúsinu, Bryggjusal. Engin aðgangseyrir. Og boðið upp á frítt kaffi.

Frekari upplýsingar og dagskrá verður birt innan skamms.

Tenglar
Hvar er draumurinn 2009 - Kraumur.is
Heimasíða Aldrei fór ég suður - www.aldrei.is

Tónlistarhátíðin Við Djúpið á Ísafirði hefur leit sína að nýjum tónskáldum í samvinnu við Kraum og Ríkisútvarpið Rás 1.

Kraumur er stuðnings- og samstarfsaðili tónlistarhátíðarinnar Við Djúpsins í ár og verkefni hátíðarinnar; Leit að nýjum tónskáldum. Stefnan er sett á að finna allt að þrjú ný tónskáld og gefa þeim tækifæri á að semja nýtt tónverk, vinna náið með reyndum flytjendum og fá verk sín frumflutt á hátíðinni í sumar.

Þetta er í annað sinn sem verkefnið fer fram, en í fyrra sömdu þrjú tónskáld verk fyrir kammersveitina Ísafold. Nú er komið að blásarakvintett Nordic Chamber Soloists að flytja verkin, en hann er skipaður ungum en mjög reyndum tónlistarmönnum frá norður Evrópu.

Tilgangur verkefnisins er að gefa ungum tónskáldum tækifæri til að vinna mjög náið með reyndum tónlistarmönnum, mun nánar en undir venjulegum kringumstæðum. Verkin verða síðan frumflutt á sérstökum lokatónleikum hátíðarinnar 27. júní 2010.

HELSTU DAGSETNINGAR

• 1. mars 2010 - Umsóknarfrestur rennur út
• 15. mars 2010 - Völdum tónskáldum falið að semja verk
• 1. maí 2010 - Drög að nýjum tónverkum kynnt fyrir aðstandendum keppninnar
• 15. maí 2010 - Verkunum skilað til Nordic Chamber Soloists

DÓMNEFND
Sérstök dómnefnd hefur var skipuð vegna samkeppninnar. Í henni sitja:

• Daníel Bjarnason, tónskáld, formaður (nánar)
• Dagný Arnalds, listrænn stjórnandi tónlistarhátíðarinnar Við Djúpið (nánar)
• Stefán Jón Bernharðsson, hornleikari
• Þuríður Jónsdóttir, tónskáld
• Ólafur Óskar Axelsson, tónskáld

REGLUR OG LEIÐBEININGAR
Í samkeppninni var notast við ákveðnar reglur. Þær má finna hér.

FREKARI UPPLÝSINGAR
Frekari upplýsingar um Leitina að nýjum tónskáldum má finna hér

Tónlistarhátíðin Við Djúpið fer fram á Ísafirði dagana 22.-27. júní (heimasíða).

Hljómsveitin Hjaltalín mun á næstu dögum og vikum leika á tónleikum í Reykjavík og víða á landsbyggðinni í tilefni af útgáfu sinnar annarar breiðskífu; Terminal.

Hljómsveitin Hjaltalín hefur ærlegt fagnaðarferðlag sitt um landið með tónleikum á Blönduósi fimmtudaginn 19. nóvember. Með í för eru Snorri Helgason og Sigríður Thorlacius & Heiðurspiltar sem eru að gefa út sínar fyrstu plötur; I’m Gonna Put My Name on Your Door og Á Ljúflingshól.

Hjaltalín hefur leikið á um eitt hundrað tónleikum síðastliðið ár, uaðallega á erlendri grundu. Tónleikar hljómssveitarinnar hérlendis á árinu eru teljandi á fingrum annarrar handar og hefur hún aldrei farið í tónleikaferð um Ísland. Því verður þessi tónleikaferð ekki eingöngu kjörið tækifæri fyrir fólk á landsbyggðinni til að upplifa tónleika Hjaltalín heldur er hér einnig á ferð langþráður draumur meðlima sveitarinnar til að sanna sig utan höfuðborgarsvæðisins og er tilhlökkunin mikil meðal hópsins.

Tónleikarnir eru sem hér segir:

• 19. nóv Blönduós – Félagsheimilið (Forsala: Potturinn og pannan)
• 20. nóv Húsavík – Gamli Baukur (Forsala: Gamli baukur)
• 21. nóv Egilsstaðir – Sláturhúsið (Forsala: Menningarsetrið Egilsstöðum)
• 22. nóv Höfn – Pakkhúsið (Forsala: Menningarmiðstöð Hornafjarðar)
• 24. nóv Keflavík – Frumleikhúsið (Forsala: Tónlistarskóli Reykjanesbæjar)
• 26. nóv Sauðárkrókur – Mælifell (Forsala: Ólafshús)
• 27. nóv Dalvík – Menningarmiðstöðin (Forsala: Kaffihús Menningarmiðst.)
• 28. nóv Akureyri – Græni hatturinn (Forsala: Eymundsson)
• 29. nóv Borgarnes – Landnámssetrið (Forsala: Landnámssetrið)

Kraumur tónlistarsjóður vinnur með og styður Hjaltalín til afreka innanlands sem utan á árinu, þar með talið tónleikahald sveitarinnar og gerð breiðskífunnar Terminal.

Kraumur er samstarfs- og styrktaraðili tónleikaferðarinnar um landið ásamt Rás 2. Tónleikarnir eru liðir í Innrásinni - átakst Kraums til stuðnings tónleikahalds innanlands.

Kraumur hefur í samvinnu við listamenn og hljómsveitir unnið að, og stutt við, mikinn fjölda tónleika innanlands um allt land í sumar.

Starfsemi Kraums undanfarna mánuði hefur að stórum hluta snúist um stuðning, samstarf og ráðgjöf á sviði tónleikahald innanlands. Innrásin, sérstakt átak Kraums til stuðning tónleikahalds á landsbyggðinni, var sett á laggirnar í fyrra og átakið hélt áfram í ár með fjölda tónleika.

Markmið Innrásarinnar er að auka við möguleika listamanna og hljómsveita til tónleikahalds, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni. Hér fyrir neðan má sjá yfirlit yfir Innrásar-tónleika ársins.

Rás 2 hefur verið sérstakur samstarfsaðili átaksins og stutt við tónleikana með kynningum og auglýsingum.

Mikil fjölbreytni hefur einkennt tónleikana þar sem listamenn og hljómsveitir hafa komið úr öllum áttum tónlistar. Árið 2008 studdi Kraumur meðal annars við tónleika Elfu Rún Kristinsdóttur, Melkorku Ólafsdóttur, Benna Hemm Hemm, tónlistarhópsins Njútón, Sign, Dr. Spock, Skáta og Bloodgroup. Meðal þeirra sem komið hafa fram á tónleikum í samstarfi og með stuðningi Kraums í vor og sumar eru;

• Mógil
• Árstíðir
• Svavar Knútur
• Árstíðir [á mynd]
• Helgi Valur [á mynd]
• FM Belfast
• Reykjavík!
• Miri
• Swords of Chaos
• Skakkamanage
• Nögl
• Gordon Riots
• Celestine
• Momentum
• Bróðir Svartúlfs
• Ljósvaki
• Fabúla
• Elíza Newman Geirsdóttir
• Þórunn Antónía
• Mysterious Marta
• Pascal Pinon
• Auk fjöldi annarra tónlistarmanna og hljómsveita…

Amiina við sjávarsíðuna

Tónleikasería þar sem aðgangur var ókeypis og leikið var í tveimur vitum, hvalasafni og Bláu kirkjunni á Seyðisfirði. (vísun)

24. júlí - Bláa kirkjan á Seyðisfirði
25. júlí - Dalatangaviti
26. júlí - Hvalasafnið á Húsavík í samstarfi við Mærudaga
27. júlí - Sauðanesviti

———————————

Molestin á Eistnaflugi tónlistarhátíð

Hljómsveitirnar Momentum, Muck, Ask the Slave, Skítur, Myra, Plastic Gods og Celestine leika á tónlistarhátíðinni Eistnaflug á Neskaupsstað 9.-12. júlí með stuðningi Kraums. (vísun)

9.-12. júlí - Eistnaflug, Neskaupsstaður

———————————

Sumargleði Kimi Records

Fram komu hljómsveitirnar Sudden Weather Change, Reykjavík!, Swords of Chaos, Skakkamanage, FM Belfast, Miri, Létt á bárunni, Prins Póló, Hellvar og Björtu. (vísun)

15. júlí - Paddy’s, Keflavík
16. júlí - Pakkhúsið, Höfn á Hornafirði
17. júlí - Herðubreið, Seyðisfirði (LungA listahátíð)
18. júlí - Mikligarður, Vopnafirði
19. júlí - Gamli Baukur, Húsavík
22. júlí - Kaffi 59, Grundarfirði
23. júlí - Edinborgarhúsið, Ísafirði
24. júlí - Café Síróp, Hvammstanga
25. júlí - Sódóma, Reykjavík (ásamt Swords of Chaos)

———————————

Rokk Innrásin

Hljómsveitirnar Nögl, Endless Dark, At Dodge City og Gordon Riots fóru Rokk Innrás um landið dagana 25. júní-4. júlí í samstarfi við og með stuðningi Kraums. Tónleikaferðin heppnaðist það vel að haldið var af stað að nýju og fleiri tónleikum bætt við 9.-18. júlí. Leikið í félagsheimilum, íþróttahúsum, veitingastöðum og börum. (vísun)

25. júní - Dillon, Reykjavík
26. júní - Kaffi 59, Grundarfjörður
27. júní - Gamla íþróttahúsið, Ísafjörður
2. júlí - Paddy’s, Keflavík
3. júlí - Mælifell, Sauðárkrókur
4. júlí - Sláturhúsið, Egilsstaðir
—
9. júlí - Sódóma, Reykjavík
11. júlí - Prófasturinn, Vestmannaeyjar
15. júlí - Molinn, Kólpavogur
16. júlí - Gamli vínbarinn (Hansen), Hafnarfjörður
17. júlí - Lukkuláki, Grindavík
18. júlí - 800 bar, Selfoss

———————————

Mógil á hringferð um landið

Hljómsveitin Mógil, sem vakið hefur verðskuldaða athygli hérlendis sem erlendis fyrir sinn einstaka þjóðlaga-skotna hljóm, lék á fernum tónleikum víðasvegar um landið í samvinnu við og með stuðningi Innrásar-átaks Kraums. (vísun)

27. júní - Sólheimum í Grímsnesi
30. júní - Fríkirkjunni í Reykjavík
1. Júlí - Þjóðlagahátið á Siglufirði
2. júlí - Deiglan á Akureyri

———————————

Hver á sér fegra föðurland

Hljómsveitin Árstíðir og trúbadorarnir Svavar Knútur og Helgi Valur gerðu víðreist um fósturjörðina og komu við í helstu bæjum og sveitum hringinn í kringum landið undir nafninu “Hver á sér fegra föðurland?” (vísun)

25. júní - Hveragerðiskirkja, Hveragerði
26. júní - 800 Bar, Selfossi
27. júní - Stykkishólmskirkja, Stykkishólmi
27. júní - Ólafsvíkurkirkja, Ólafsvík
28. júní - Flateyjarkirkja, Flatey
29. júní - Sjóræningjasafnið á Patreksfirði
30. júní - Tálknafjarðarkirkja, Tálknafirði
1. júlí - Hlaðan í Arnardal við Ísafjarðardjúp
2. júlí - Hólmavíkurkirkja, Hólmavík
3. júlí föstudagur - Félagsheimilið Höfðaborg, Hofsósi
Tónleikar hefjast kl. 20
4. júlí - Siglufjörður (Þjóðlagahátíð)
Hljómsveitirnar heimsækja Siglufjörð og njóta þjóðlagahátíðarinnar þar í bæ.
5. júlí - Félagsheimilið, Grímsey
7. júlí - Gamli baukur, Húsavík
8. júlí - Egilsstaðakirkja, Egilsstöðum
9. júlí - Neskaupstaður (Eistnaflug)
Hljómsveitirnar njóta rokkhátíðarinnar Eistnaflugs á Neskaupstað
10. júlí - Úlfaldi úr Mýflugu, Hlaða í Mývatnssveit
11. júlí - Græni Hatturinn, Akureyri
12. júlí - Café Rósenberg, Reykjavík

———————————

Hljóðverssmiðjur á Flateyri

Hljóðverssmiðjur Kraums í Tankinum á Flateyri í samvinnu við Músíktilraunir, með Mugison og fleiri leiðbeinendum. Þátttakendur eru Bróðir Svartúlfs, Ljósvaki og The Vintage sem skipuðu þrjú efstu sætin á Músíktilraunum 2009, þeir leika óvænt á tónleikum á Flateyri meðan á Smiðjunum stendur. (vísun)

14. júní - Vagninn, Flateyri

———————————

Trúbatrixur á hringerð um landið

Trúbatrixur fagna grósku íslenskra tónlistarkvenna með safndisk og tónleikaferð um landið - í samstarfi við Innrásarverkefni Kraums og Rás 2. Fram koma Fabúla, Elíza Geirsdóttir Newman, Þórunn Antónía, Elín Ey, Mysterious Marta, Pascal Pinon og fleiri. (vísun)

2. júní - Trúbatrix Album Launch @ Café Rósenberg, Reykjavík
3. júní - Kaffi 59, Grundarfjörður
4. júní - Græni Hatturinn,Akureyri
5. júní - Kaffi Sæli, Tálknafjörður
6. júní - Edinborg, Ísafjörður
11. júní -  Draugasetrið, Stokkseyri
12. júní - Pakkhúsið, Höfn í Hornafirði
13. júní - Hótel Aldan, Seyðisfjörður

———————————

Hvar er draumurinn?

Samstarf við tónlistarhátíðina Aldrei fór ég suður. Fjölmargir reynsluboltar úr íslensku tónlistarlífi deildu reynslu sinni á námskeiði Kraums og Aldrei fór ég suður. (vísun)

10-11. apríl - Aldrei fór ég suður, Ísafjörður

———————————

Hlekkir:
Innrásin á Wikipedia
Innrásin á Kraumur.is

Hljómsveitin Amiina heldur ferna tónleika við sjávarsíðuna viðsvegar um landið dagana 24.-27. júlí í samstarfi Kraum tónlistarsjóð. Aðgangur er ókeypis.

Hljómsveitin amiina, í samstarfi við Kraum tónlistarsjóð, heldur ferna tónleika við sjávarsíðuna um næstu helgi (24.-27. júlí). Spilað verður í tveimur vitum, hvalasafni og Bláu kirkjunni á Seyðisfirði. Tónleikadagskráin verður aðlöguð að umhverfinu; stutt efnisskrá með sérsniðnum útsetningum sem  hæfa umgjörðinni, í mikilli nánd við sjóinn sem og áheyrendur.

Tónleikarnir eru liður í Innrás Kraums til stuðnings tónleikahaldi innanlands.

Aðgangur er ókeypis.

Dagsetningar:
24. júlí kl.17 - Bláa kirkjan á Seyðisfirði
25. júlí kl.16 - Dalatangaviti
26. júlí kl. 21 - Hvalasafnið á Húsavík í samstarfi við Mærudaga
27. júlí kl. 17 - Sauðanesviti

Amiina heimasíða: www.amiina.com

Hljómsveitirnar Momentum, Muck, Ask the Slave, Skítur, Myra, Plastic Gods og Celestine leika á tónlistarhátíðinni Eistnaflug á Neskaupsstað 9.-12. júlí með stuðningi Kraums.

Eistnaflug Rokkfestival í Egilsbúð, Neskaupsstað, er ein af þeim tónlistarhátíðum sem sprottið hafa upp á landsbyggðinni á síðustu árum og náð að festa sig í sessa sem einn af skemmtilegustu tónlistarviðburðum ársins. Hátíðin er tileinkuð þyngri tegund rokktónlistar og var fyrst haldin árið 2005.

Molestin félagskapurinn og plötuútgáfan er með sérstakt kvöld á hátíðinni fimmtudaginn 9. júlí þar sem koma hljómsveitirnar Momentum, Muck, Ask the Slave, Skítur, Myra, Plastic Gods og Celestine. Tónleikarnir verða teknir upp og stendur til að gefa þá út á DVD, til kynningar á hljómsveitunum.

Innrásar-átak Kraums styður við tónleika þessara hljómsveita og upptökur á kvöldinu.

Hlekkir:
Eistnaflug
Molestin

Innrásarátak Kraums heldur áfram! Hljómsveitirnar Sudden Weather Change, Reykjavík!, Swords of Chaos, FM Belfast, Skakkamanage og Miri leika á tónleikum um allt lan dagana 15.-25. júlí.

Sumargleði Kimi Records fer nú af stað í annað sinn. Nú miklu stærri en í fyrra! Tónleikaferðin er farin með stuðningi Kraums við tónlistarmennina og tónleikahaldið, og er hluti af Innrásar-átaki Kraums til stuðnings tónleikahaldi innanlands.

Tónleikaferðalagið  hefst miðvikudaginn 15. júlí í Keflavík og lýkur með stórtónleikum í höfuðborginni laugardagskvöldið 25. júlí. Öll tónleikakvöldin hefjast á léttum og skemmtilegum ‘Popquiz’ spurningaleik í anda Popppunkts.

Á heimasvæði Sumargleðinnar er að finna nánari upplýsingar um hljómsveitir og dagskrá. Þar er einnig að finna fría safnskífu með lögum eftir sumargleðissveitir.

Í stuttu máli…

Hvar: Gleðin breiðir úr sér um allt land
Hvenær: 15.júlí – 19.júlí og 22.júlí – 25.júlí
Allir tónleikarnir byrja klukkan 20:00 með popquiz spurningaleik
Miðaverð: 1.500 krónur inn á hvert kvöld
Vefsvæði: www.kimirecords.net/sumargledi

Sumargleði hluti 1:

Hljómsveitir: Sudden Weather Change, Reykjavík! og Swords of Chaos
Miðvikudagurinn 15. júlí: Paddy’s, Keflavík (ásamt Hellvar)
Fimmtudagurinn 16. júlí: Pakkhúsið, Höfn á Hornafirði
Föstudagurinn 17. júlí: Herðubreið, Seyðisfirði (L.ung.A - ásamt Miri, Létt á bárunni, Prins Póló og Björtu)
Laugardagurinn 18. júlí: Mikligarður, Vopnafirði
Sunnudagurinn 19. júlí: Gamli Baukur, Húsavík

Sumargleði hluti 2:

Hljómsveitir: FM Belfast, Sudden Weather Change, Skakkamanage og Miri
Miðvikudagurinn 22. júlí: Kaffi 59, Grundarfirði
Fimmtudagurinn 23. júlí: Edinborgarhúsið, Ísafirði
Föstudagurinn 24. júlí: Café Síróp, Hvammstanga
Laugardagurinn 25. júlí: Sódóma, Reykjavík (ásamt Swords of Chaos)

Tónleikaferðin er farin í samstarfi við, og með stuðningi, Kraums tónlistarsjóðs. Aðrir stuðningsaðilar eru
Rás 2, Reykjavik Grapevine og Eymundsson.