Kraumur tónlistarsjóður, Hönnunarsjóður Auroru og Hönnunarmiðstöð Íslands með jólapartý í Vonarstrætinu

Aldrei þessu vant verður glatt á hjalla í Vonarstrætinu í dag frá klukkan 17-19.  Nágrannarnir sem deila húsnæðinu að Vonarstræti 4b ætla endurtaka leikinn frá því í fyrra og bjóða vinum og vandamönnum að njóta með sér góðs félagskapar og léttra veitinga í húsakynnum okkar.

Gamanið hefst eins og áður sagði klukkan 17.00. Gestgjafar eru Hönnunarmiðstöð Íslands, Hönnunarsjóður Auroru og Kraumur tónlistarsjóður.

Kraumur og nágrannar voru með opið hús og tónleika í Vonarstræti á Menningarnótt.

Kraumur tónlistarsjóður, Hönnunarsjóður Auroru og Hönnunarmiðstöð Íslands - sem deila húsnæði að Vonarstræti 4B - voru með opið hús og dagskrá á Menningarnótt (laugardagskvöldið 21. ágúst). Dagskrá var bæði innanhús og í portinu þar sem hljómsveitin Orphic Oxtra tók lagið, sýndar voru upptökur frá HönnunarMarsi 2010 og sitthvað fleira. Góð mæting og stemmning.

Fleiri myndir má finna á Facebook síðu Kraums með því að smella hér - www.facebook.com/kraumur

Nýr þáttur Sleepless in Reykjavik kominn á netið með viðtölum og umfjöllun um starfsemi Kraums.

Þriðji þáttur vefþáttarins Sleepless in Reykjavik, sem sérhæfir sig í umfjöllun um íslenska tónlist og íslenskt tónlistarlíf, er komið á netið. Meðal efnis í þættinum er umfjöllun um starfsemi Kraums og viðtal við Eldar Ástþórsson, framkvæmdastjóra Kraums, og Elízu Geirsdóttir Newman, sem fer fyrir Trúbatrix hópnum, og var stödd á skrifstofu Kraums þegar liðsmenn SIR bar að garði.

Sleepless in Reykjavik hefur vakið verðskuldaða athygli fyrir flotta þætti sína, en hver þáttur er um 15 mínutur að lengd. Viðtalið og umfjöllunin um Kraum hefst á mínútu 05.35 en þátturinn hefst á umfjöllun um myndbandagerð hljómsveitarinnar Ourlives og endar á tónleikaferð Árstíða um Vestfirði. Meðal efnis í fyrstu þrem SIR þáttunum hefur verið;

• Ólafur Arnalds, viðtal (þáttur #1)
• Kynning á Sleepless in Reykjavik (þáttur #1)
• Heimsókn til gogoyoko.com (þáttur #1)
• Viðtal við Reykjavík! (þáttur #2)
• Heimsókn á æfingu Hjaltalín og Sinfóníuhljómsveitar Íslands (þáttur #2)
• Kynning á Eistnaflug tónlistarhátíð (þáttur #2)
• Dalton og Elektra á tónleikaferð (þáttur #2)
• Hljómsveitin Árstíðir á Vestjförðum (þáttur #3)
• Ourlives myndbandagerð (þáttur #3)
• Kraumur tónlistarsjóður heimsóttur (þáttur #3)

Hlekkir
Sleepless in Reykjavik - www.sir.is
Viðtal við skapara þáttana - Gunnar B. Guðbjörnsson-Sound & Vision
Sleepless in Reykjavik þáttur nr. 3 á Vimeo
Sleepless in Reykjavik á Facebook

The Sleepless In Reykjavik WebTv Series - Episode 3 from Gussi - Sleepless In Reykjavik on Vimeo.

Kraumur og nágrannar í Vonarstræti sameinast um dagskrá og verða með opið hús á Menningarnótt. Kraumur og Trúbatrix bjóða upp á tónleika á Rósenberg.

Kraumur tónlistarsjóður, Hönnunarsjóður Auroru og Hönnunarmiðstöð Íslands - sem deila aðstöðu í húsinu að Vonarstræti 4B (portið á móti Iðnó) - verða með opið hús og sameinast um dagskrá á Menningarnótt. Hljómsveitin Orphic Oxtra (mynd) mun taka lagið, lifandi upptökur frá HönnunarMarsi 2010 sýndar, svipmyndir frá hönnunarsýningunum Iceland Contemporary Design sem opnaði á Listahátíð 2009 og sitthvað fleira.

Opið hús og dagskrá frá klukkan 18.00-22.00. Orphic Oxtra spilar klukkan 20.00. Allir velkomnir!!

Auk þess mun Kraumur og Trúbatrix bjóða upp á tónleika á Kaffi Rósenberg. Tónleikarnir þar eru liður í tónleikaferð um landið þar sem Lára, Myrra Rós og fleiri tónlistarkonur leika víða um land. Húsið opnar klukkan 20.00 og tónleikarnir hefjast skömmu síðar. Aðgangur er ókeypis.

Hlekkir
Trúbatrix og Kraumur tónleikaferð - Tónlistarkonur leggja land undir fót
Trúbatrix Hönnunarsjóður Auroru - www.honnunarsjodur.is
Hönnunarmiðstöð Íslands - www.honnunarmidstod.is
Menningarnótt - www.menningarnott.is

Hljómsveitin Útidúr lék á Vorhátíð í Vonarstræti

Hönnunarmiðstöð Íslands, Hönnunarsjóði Auroru og Kraumur tónlistarsjóður - sem deila húsnæði við Vonarstræti 4B - stóð ásamt fjölda fagfélaga fyrir Vorhátíð föstudaginn 28. maí. Mikil og góð stemmning myndaðist í portinu. Boðið var upp á veitingar og gleði. Hljómsveitin Útidúr lék nokkur lög við góðan orðstír.

Takk fyrir komuna og takk fyrir okkur Útidúr fyrir frábæra tónleika!

Hlekkir:

• Útidúr á Facebook
• Útidúr á MySpace
• Útidúr á gogoyoko
• Hönnunarmiðstöð Íslands
• Hönnunarsjóður Auroru

Fleiri myndir á Facebook síðu Kraums.

Vorhátíð í Vonarstræti 4B klukkan 17.00 í dag, föstudaginn 28. maí.

Hljómsveitin Útidúr leikur lög. Veitingar og gleði. Í portinu við Vonarstræti 4B þar sem Kraumur tónlistarsjóður, Hönnunarsjóður Auroru og Hönnunarmiðstöð Íslands deila húsnæði.

Kraumur, Hönnunarsjóður Auroru og Hönnunarmiðstöð Íslands fagna flutningi starfsemi sinnar í Vonarstrætið.

Hönnunarmiðstöð Íslands, Hönnunarsjóður Auroru og Kraumur tónlistarsjóður deila nú húsnæði í Vonarstræti 4b. Hönnunarmiðstöðin er á efri hæð hússins og Kraumur og Hönnunarsjóður Auroru deila með sér kjallararýminu.

Veglegt innflutningshóf var haldið í tilefni nýs hlutverk hússins föstudaginn 20. nóvember. Innsetning Andrew Burgess arkitekts setti svip á Vonarstrætið að utan. Letrið Copper Stencil sem teiknað er fyrir Hönnunarsjóð Auroru af Gunnari Þ. Vilhjálmssyni var gefið út. Ljósmyndasýning Harðar Sveinssonar helguð íslensku tónlistarlífi, Myndir og Mayhem, var enduropnuð í samvinnu við Kraum tónlistarsjóð.

Einnig komu fram hljómsveitirnar Sudden Weather Change og Nolo.

Margvísleg starfsemi hefur verið í húsinu að Vonarstræti 4B. Húsið tengist sögu verksmiðjuiðnaðar í Reykjavík og er teiknað af Pjetri Ingimundarsyni forsmiði. Magnús Th. S. Blöndahl smiður og athafnamaður byggði húsið árið 1928 sem verksmiðjuhús til brjóstsykurs- og konfektgerðar. Ári seinna var starfsemin aukin og frá 1929 rak Magnús Blöndahl þar kaffibrennslu samhliða sælgætigerðinni. Sælgætisgerð var rekin í húsinu allt til ársins 1967 þegar mikill bruni var á svæðinu og húsið skemmdist nokkuð.

Árið 1977 var búið að breyta húsnæði í skrifstofur, en kaffibrennslan var rekin í húsinu allt til ársins 1979, þegar vélarnar eyðilögðust af eldi. Um tíma var rekin heildverslun í húsinu en árið 1993 fékkst leyfi til að breyta því í íbúð og skrifstofu. Frá 1995 hafði Umhverfisráðuneytið húsnæðið á leigu og árið 2005 hófu foreldrasamtökin Vímulaus æska starfsemi í húsinu og rak þar Foreldrahús. Engin starfsemi hefur verið í húsnæðinu í síðastliðinn tvö ár, þar til nú. (heimild; Minjasafn Reykjavíkur, skýrsla 126).

Margvísleg starfsemi tengd íslenskri hönnun, arkitektúr og tónlist verður nú í aðalhlutverki í Vonarstræti 4b.

Kraumur tónlistarsjóður, Hönnunarmiðstöð Íslands og Hönnunarsjóður Auroru fagna opnun starfsemi sinnar í húsnæðinu að Vonarstræti 4b.

Föstudaginn 20. nóvember mun Kraumur ásamt nýjum nágrönnum sínum í Vonarstrætinu, Hönnunarmiðstöð Íslands og Hönnunarsjóði Auroru, bjóða í innflutninspartý.

- Innsetning Andrew Burgess arkitekts
- Myndir & Mayhem ljósmyndasýning Harðar Sveinssonar
- Útgáfa letursins Golden Aurora eftir Gunnar Þ. Vilhjálmsson

Lifandi tónlist. Léttar veitingar.

Vel heppnuð vinnusmiðja um hvernig tónlistarmenn geta komið tónlist sinni á framfæri á netinu haldin á skrifstofu Kraums tónlistarsjóðs í Vonarstræti.

Hópur tónlistamanna sótti vinnusmiðju á vegum Útflutningsráðs íslenskrar tónlistar (ÚTÓN / IMX) um hvernig koma megi sér og tónlist sinni á framfæri á netinu. Hópurinn hefur síðustu vikur sótt námskeið með sama markmiði, sem endaði á þessari smiðju.

Ariel Hyatt fjölmiðlaplöggari frá Cyber PR í New York hafði umsjón með smiðjunni, en hún hefur víðtæka reynslu af markaðssetningu á netinu og hefur á síðustu 13 árum verið fulltrúi yfir 1400 tónlistarmanna.

Vinnusmiðjan fór fram í gær, þriðjudaginn 3. nóvember, í nýju skrifstofurými Kraums og Hönnunarsjóðs Auroru, í kjallaranum að Vonarstræti 4B.

Hlekkir:
Útflutningsskrifstofa íslenskrar tónlistar (ÚTÓN / IMX)
Arial Publicity, Cyber PR
Arial Hyatt music blog
Ariel Hyatt Talks About Her New Book “Music Success in 9 Weeks” (video)

Kraumur tónlistarsjóður flytur í Vonarstrætið.

Kraumur tónlistarsjóður flytur starfsemi sína af Klapparstíg 16 niður í kvosina, Vonarstræti 4a. Í kjallara hússins mun sjóðurinn deila aðstöðu með Hönnunarsjóði Auroru og mun rýmið vera nýtt fyrir margskonar starfsemi sjóðana tveggja. Á efri hæðinni er Hönnunarmiðstöð Íslands staðsett.

Stefnan er að Vonarstrætið geti hýst ýmsa fundi og uppákomur sem eru á vegum Kraums og Hönnunarsjóðsins, eða tengjast starfsemi þeirra.

Þriðjudaginn 3. nóvember mun nýtt heimili Kraums vera vettvangur fyrir vinnusmiðjur á vegum Útflutningsskrifstofu íslenskrar tónlistar (ÚTÓN) um markaðsetningu tónlistarmanna á netinu. Það er Ariel Hyatt fjölmiðlaplöggari frá Cyber PR í New York sem hefur umsjón með smiðjunni, þar sem íslenskum listamönnum og hljómsveitum verða kynntir möguleikar um hvernig koma eigi sér og tónlist sinni á framfæri á netinu. Síðar um kvöldið heldur Ariel tölu á fyrsta fræðslukvöldi ÚTÓN í vetur sem haldið verður í Norræna húsinu.